مەملەكەت باسشىسى قاسىم-جومارت توقايەۆ مادەنيەت جانە ونەر قىزمەتكەرلەرىن ماراپاتتاۋ راسىمىندە ءسوز سويلەدى، دەپ حابارلايدى Bairaqmedia.kz.
مادەنيەت جانە ونەر قىزمەتكەرلەرىنىڭ كاسىبي مەرەكەسى قارساڭىندا اقوردادا سالتاناتتى جيىن ءوتتى. پرەزيدەنت ۇلتىمىزدىڭ ءبولمىس-بىتىمىن ساقتاۋعا، حالقىمىزدىڭ رۋحانياتىن بايىتۋعا زور ۇلەس قوسىپ جۇرگەن سالا قىزمەتكەرلەرىنە ريزاشىلىعىن ءبىلدىردى.
مادەنيەت – ۇلتتىڭ ءتولقۇجاتى. جاھان جۇرتى ەلىمىزدى، ەڭ الدىمەن، ونەرىمىز ارقىلى تانىپ بىلەدى. ءبىز – ۇلى دالادا تامىر جايعان بىرەگەي مادەنيەتتىڭ زاڭدى مۇراگەرىمىز. قازاق جەرىنەن شىققان قايتالانباس ونەر يەلەرىنىڭ تەڭدەسسىز تۋىندىلارى تۇتاس ۇلتتى تاربيەلەدى. ءقازىر ءتول مادەنيەتىمىز دۇنيە جۇزىنە تانىلىپ جاتىر. تالانتتى مۋزىكانتتارىمىز الەمدىك ساحنالاردا تابىستى ونەر كورسەتىپ ءجۇر. قازاق كينوگەرلەرى ءتۇرلى حالىقارالىق بايقاۋلارعا قاتىسىپ، ساراپشىلاردىڭ جوعارى باعاسىنا يە بولۋدا. ەلوردامىزدا دۇنيەجۇزىلىك كوشپەندىلەر ويىندارى تابىستى ءوتتى. اقتاۋ قالاسى تۇركى الەمىنىڭ مادەني استاناسى بولىپ جاريالاندى. رۋحاني مۇرالارىمىز سيفرلىق فورماتقا كوشىرىلە باستادى. تاياۋدا ۇلتىمىزدىڭ ءبىر جارىم مىڭ ان-كۇيى مەن فولكلورلىق مۇراسى ەڭ تانىمال حالىقارالىق پلاتفورمالارعا سالىندى. ءتول ونەرىمىز كرەاتيۆتى يندۋستريا ارقىلى بارىنشا ناسيحاتتالۋدا، – دەدى پرەزيدەنت.
قاسىم-جومارت توقايەۆتىڭ ايتۋىنشا، مەملەكەت ونەر سالاسىن وركەندەتۋگە ءاردايىم ەرەكشە ءمان بەرەدى. ويتكەنى مادەنيەتى وزىق ەلدىڭ رۋحى بيىك بولادى.
بىلتىردىڭ وزىندە 45 جاڭا مادەنيەت نىسانى سالىندى. بۇل جۇمىس بولاشاقتا دا جالعاسىن تابادى. تەاتر – رۋحانياتىمىزدىڭ نەگىزگى تىرەگىنىڭ ءبىرى. ۇلتتىق قۇرىلتايدىڭ بۋرابايدا وتكەن وتىرىسىندا ايماقتاعى تەاترلاردى دامىتۋ تۋرالى ناقتى تاپسىرما بەرىلدى. تەاترلاردىڭ كوپشىلىگى تولىق جاڭعىرتۋدى قاجەت ەتەدى. كەيبىرىنە جاڭا عيمارات كەرەك. وسى جۇمىسقا كاسىپكەرلەر مەن مەسەناتتاردى جۇمىلدىرعان ابزال. بۇل – الەمدە كەڭ تارالعان تاجىريبە. مۇنداي جوبالارعا ينۆەستيسيا سالۋعا دايىن ازاماتتار از ەمەس. مەن بيزنەس وكىلدەرىن رۋحانياتىمىزدى دامىتۋ ىسىنە اتسالىسۋعا شاقىرامىن، – دەدى مەملەكەت باسشىسى.
پرەزيدەنت ەلىمىزدە ىرگەلى مادەنيەت وشاقتارى كوپ ەكەنىنە نازار اۋدارىپ، ولار تالاي جىلدان بەرى كورەرمەن قاۋىمعا تاعىلىمدى قويىلىمدار ۇسىنىپ كەلە جاتقانىن جەتكىزدى.
وسى ورايدا بيكەن ريموۆا اتىنداعى قازاق دراما تەاترىنا، الماتى قالاسىنداعى مەملەكەتتىك قۋىرشاق تەاترىنا جانە عاريفوللا قۇرمانعالييەۆ اتىنداعى فيلارمونياعا اكادەميالىق مارتەبە بەرۋ قاجەت دەپ سانايمىن. بۇل قادام مادەنيەت مەكەمەلەرىنىڭ جۇمىسىنا تىڭ سەرپىن بەرەرى ءسوزسىز، – دەدى مەملەكەت باسشىسى.
