قازاقستاندىق مەكتەپتەردە جىنىستىق تاربيە بويىنشا ءپاندى ەنگىزۋ الداعى ۋاقىتتا جوسپارلانىپ وتىرعان جوق. بۇل تۋرالى وقۋ-اعارتۋ ءمينيسترى عاني بەيسەمبايەۆ ايتتى، دەپ حابارلايدى Bairaqmedia.kz. 

ونىڭ ايتۋىنشا، وقۋشىلاردىڭ تاربيەسىنە قاتىستى الدىمەن اتا-انالاردىڭ جاۋاپكەرشىلىگىن ارتتىرۋ كەرەك.

بۇل ءاردايىم سولاي بولعان، ياعني وتباسىندا تاربيەلەنگەن. سول سەبەپتى ءبىز ارنايى اتا-انالاردى پەداگوگيكالىق قولداۋ ورتالىقتارىن اشتىق. مەن پسيحولوگتارعا سول جەردە اتا-انالاردى بالالارمەن قالاي قارىم-قاتىناس جاساۋ كەرەك، بالالاردى قالاي تاربيەلەۋ كەرەك دەگەن ماسەلەلەر بويىنشا بارىنشا اعارتۋ جۇمىستارىن جۇرگىزسىن دەپ تاپسىرما بەردىم، – دەدى عاني بەيسەمبايەۆ.

بۇل رەتتە مينيستر جالپى تاربيەمەن قاتار جىنىستىق قاتىناسقا قاتىستى تاربيەنى دە بالا اتا-انادان الۋعا ءتيىس دەگەن ويدا ەكەنىن جەتكىزدى.

ارينە، مەكتەپ تە بۇل جاۋاپكەرشىلىكتەن قاشپايدى، ءبىراق بۇكىل جاۋاپكەرشىلىكتى تەك مەكتەپكە ارتۋ دۇرىس ەمەس دەپ ويلايمىن. مەكتەپ بۇل جاۋاپكەرشىلىكتەن باس تارتىپ جاتقان جوق. ءبىز «ءبىرتۇتاس تاربيە» باعدارلاماسى اياسىندا ءتيىستى ءىس-شارالار وتكىزىپ جاتىرمىز، ءبىراق تىكەلەي جىنىستىق قاتىناس ماسەلەسى ەمەس. بۇل تاربيە، ەڭ الدىمەن، اتا-انالار تاراپىنان جۇرگىزىلۋى ءتيىس. سوندىقتان، اتا-انالار وسى ىسپەن اينالىسسا، بۇل وتە جاقسى بولادى دەپ سانايمىن. ءبىز بۇل باعىتتا قولداۋ كورسەتەمىز، – دەدى مينيستر.

ۆەدومستۆو باسشىسى الداعى ۋاقىتتا ءبىلىم بەرۋ مەكەمەلەرىندە جىنىستىق قاتىناس تاقىرىبىنا بايلانىستى پاندەر نەمەسە ساباقتار وقىتىلمايتىنىن ايتتى.