الماتىلىق جولشىلار مەكتەپ ءبىتىرۋشى تۇلەكتەرمەن جانە ولاردىڭ اتا-انالارىمەن كەزدەستى دەپ حابارلايدى bairaqmedia.kz

الماتى قالاسىندا مەكتەپ تۇلەكتەرىنىڭ بولاشاق ماماندىعىن تاڭداۋعا باعىت بەرۋ ماقساتىندا كەزدەسۋ ءوتتى. جول اكتيۆتەرى ساپاسىنىڭ ۇلتتىق ورتالىعى الماتى قالالىق فيليالىنىڭ ماماندارى الاتاۋ اۋدانىنداعى №160 مەكتەپكە بارىپ، وقۋشىلارمەن جانە  ولاردىڭ اتا-انالارىمەن جۇزدەستى.

مەكەمە قىزمەتكەرلەرى بۇعان دەيىن دە ءتۇرلى وقۋ ورىندارىندا جولشى ماماندىعىنىڭ ماڭىزدىلىعى تۋرالى اقپارات بەرىپ، كاسىبي باعدار بەرۋ جۇمىستارىن جۇرگىزىپ كەلەدى. الايدا، اتا-انالارمەن كەزدەسۋدىڭ ءوز ەرەكشەلىگى بار. ويتكەنى، بالا بولاشاعى جايلى شەشىم قابىلداۋدا اتا-انانىڭ ءرولى ەرەكشە ەكەنى تۇسىنىكتى.

مەكتەپ ءبىتىرۋشى تۇلەكتىڭ بولاشاق ماماندىعىن تاڭداۋى – ۇلكەن جاۋاپكەرشىلىك. بۇل شەشىمگە اتا-انانىڭ پىكىرى مەن قولداۋى قاتتى اسەر ەتەدى. سوندىقتان ءبىز تەك وقۋشىلارمەن ەمەس، اتا-انالارمەن دە جەكە كەزدەسىپ، جول سالاسى تۋرالى تولىق مالىمەت بەرۋدى ءجون كوردىك، – دەيدى ينجەنەر دوسجان سۇراپبەرگەنوۆ.

بۇگىندە ەلىمىزدە جول سالاسىندا مامان تاپشىلىعى بار. بۇل سالادا ءبىلىم الىپ شىققان تۇلەكتەر ءۇشىن جۇمىسقا ورنالاسۋ مۇمكىندىگى جوعارى. سونىمەن قاتار، جولشى ماماندىعى – ەلدىڭ ينفراقۇرىلىمدىق دامۋىنا تىكەلەي ۇلەس قوساتىن، سۇرانىسى ەشقاشان تومەندەمەيتىن ماڭىزدى سالا.

كەزدەسۋ بارىسىندا اتا-انالار وزدەرىن مازالاعان سۇراقتارعا جاۋاپ الىپ، ماماندىق تاڭداۋ ماسەلەسىنە باسقاشا قىرىنان قاراۋعا مۇمكىندىك الدى. ينجەنەرلەر جول ساپاسىن باقىلاۋ، جوبالاۋ، قۇرىلىس جانە تەحنيكالىق قاداعالاۋ سياقتى باعىتتاردىڭ قازىرگى تاڭدا وتە وزەكتى ەكەنىن اتاپ ءوتتى.

وسىنداي كاسىپتىك باعدار بەرۋ كەزدەسۋلەرى الداعى ۋاقىتتا دا جالعاسىن تاپپاق. جول سالاسىنىڭ ماماندارى وسكەلەڭ ۇرپاققا دۇرىس باعىت-باعدار بەرىپ، ولاردىڭ كاسىبي بولاشاعىنا ۇلەس قوسۋدى ماقسات ەتىپ وتىر.