ەلىمىزدە 2027 جىلعا دەيىن 2 ملرد اعاش وتىرعىزۋ جۇمىستارى جۇرگىزىلىپ جاتىر. بۇل تۋرالى ەكولوگيا جانە تابيعي رەسۋرستار ءمينيسترى ۇكىمەت وتىرىسىندا ايتتى، دەپ حابارلايدى Bairaqmedia.kz.
ۆەدومستۆو باسشىسىنىڭ ايتۋىنشا، بۇگىندە مەملەكەتتىك ورمان قورى اۋماعىندا 1،3 ملرد كوشەت وتىرعىزىلعان، ونىڭ ىشىندە ارال تەڭىزىنىڭ قۇرعاعان تابانىنا 48،7 ملن سەكسەۋىل كوشەتى وتىرعىزىلعان.
سونىمەن قاتار، ەلدى مەكەندەر اۋماعىندا 15 ملن اعاش وتىرعىزۋ بويىنشا تاپسىرما ورىندالدى.
2024 جىلدان باستاپ ورمان مەليوراسيالىق جۇمىستاردىڭ ەداۋىر كولەمى ءىرى كومپانيالاردىڭ قاتىسۋىمەن بيۋدجەتتەن تىس قاراجات ەسەبىنەن جۇزەگە اسىرىلىپ جاتىر. جەرسىنۋى مەن ومىرشەڭدىك دەڭگەيى جوعارى ساپالى وتىرعىزۋ ماتەريالىمەن قامتاماسىز ەتۋ ماقساتىندا ورمان ءتالىمباقتارىن قۇرۋ جۇمىستارى جۇرگىزىلىپ جاتىر.
قازالى قالاسىنداعى 33 گەكتار الاڭدا قۋاتتىلىعى جىلىنا 3 ملن كوشەت بولاتىن ورمان ءتالىمباعىنىڭ قۇرىلىسى اياقتالدى. بيىل اۋدانى 15 گەكتار جاڭا ءتالىمباقتى جوبالاۋ بويىنشا جۇمىستار جۇرگىزىلىپ جاتىر. سونداي-اق ورمان مەليوراسيالىق جۇمىستارمەن اينالىساتىن قىزمەتكەرلەر ءۇشىن وندىرىستىك مودۋلدەردى جەتكىزۋ جۇزەگە اسىرىلدى.
