اۋعانستاندى ساۋدا-ەكونوميكالىق قاتىناستارعا تارتۋ وسى ەلدى قالپىنا كەلتىرۋدى جىلدامداتادى. بۇل تۋرالى پرەزيدەنت قاسىم-جومارت توقايەۆ «ورتالىق ازيا – جۇڭگو» ءىى سامميتىندە ايتتى، دەپ حابارلايدى Bairaqmedia.kz.
ءبىزدىڭ ءوزارا ءىس-قيمىلىمىزدىڭ تاعى ءبىر اسپەكتىسى – ول اۋعانستان. ءبىزدىڭ ويىمىزشا، بۇل ەلدى ساۋدا-ەكونوميكالىق قاتىناستارعا تارتۋ ونى قالپىنا كەلتىرۋگە جانە حالىقارالىق وقشاۋلانۋدان شىعارۋعا ىقپال ەتەدى. ءدال وسى باعىتتا ءبىز اۋعانستان ۇكىمەتىمەن جۇمىس ىستەپ جاتىرمىز. جۇڭگو مەن ورتالىق ازيا ەلدەرىنە الماتى قالاسىندا ورتالىق ازيا جانە اۋعانستان ءۇشىن بۇۇ-نىڭ وڭىرلىك ورتالىعىن قۇرۋعا قولداۋ كورسەتكەنى ءۇشىن العىسىمدى بىلدىرەمىن، - دەدى قاسىم-جومارت توقايەۆ.
پرەزيدەنتتىڭ ايتۋىنشا، ءوڭىردىڭ بولاشاعى وسى اۋماقتاعى ەلدەردىڭ ءوزارا مۇددەلەردى ەسكەرە وتىرىپ، بىرلەسىپ ارەكەت ەتە الۋىنا بايلانىستى. وسى ورايدا «ورتالىق ازيا-قىتاي» فورماتى جاسامپاز ستراتەگيالىق سەرىكتەستىكتىڭ ايقىن ۇلگىسىنە اينالاتىنىنا سەنىم ارتتى.
ايتا كەتسەك، استانادا «ورتالىق ازيا – جۇڭگو» ءىى ءسامميتى جۇمىسىن باستادى. ءىس-شاراعا مەملەكەت باسشىسى قاسىم-جومارت توقايەۆ، قحر ءتوراعاسى سي سزينپين، وزبەكستان پرەزيدەنتى شاۆكات ميرزيويەۆ، قىرعىزستان پرەزيدەنتى سادىر جاپاروۆ، تۇرىكمەنستان پرەزيدەنتى سەردار بەردىمۇحامەدوۆ جانە تاجىكستان پرەزيدەنتى ەمومالي راحمون قاتىسىپ جاتىر.
