الماتى وبلىسىندا «تازا قازاقستان» اكسياسى اياسىندا كوگالداندىرۋ بويىنشا جۇمىس قارقىندى جالعاسۋدا. ءقازىردىڭ وزىندە جوسپارلانعان 110 مىڭ ءتۇپ اعاشتىڭ جارتىسىنان استامى وتىرعىزىلعان دەپ حابارلايدى bairaqmedia.kz

2025 جىلعا بەكىتىلگەن وڭىرلىك جوسپارعا سايكەس، الماتى وبلىسىندا 110 مىڭ اعاش وتىرعىزۋ جوسپارلانعان. كوكتەمدە سونىڭ جارتىسىنان كوبى، ياعني، 65 مىڭنان استام تال ەگىلدى.

ەڭ كوپ جاسىل جەلەك ەڭبەكشىقازاق اۋدانىندا، قونايەۆ قالاسىندا جانە تالعار اۋدانىندا وتىرعىزىلعان. بالقاش، جامبىل، ىلە، قاراساي، كەگەن، رايىمبەك، ۇيعىر اۋداندارىندا جانە الاتاۋ قالاسىندا دا تال ەگۋ بويىنشا جۇمىس قارقىندى جۇرگىزىلۋدە.

كوشەتتەردى الەۋمەتتىك جاۋاپكەرشىلىگى جوعارى ازاماتتار، كاسىپكەرلەر، كاسىپورىندار مەن ۇيىمدار ءوز قاراجاتتارى ەسەبىنەن الۋدا. بۇل ولاردىڭ ەكولوگيالىق ماسەلەلەردى شەشۋگە جانە تۋعان جەردىڭ بولاشاعىنا دەگەن قامقورلىعىنا ناقتى ۇلەس قوسىپ وتىرعانىنىڭ جارقىن كورىنىسى.

جاسىل ايماقتار قۇرۋ — تەك قانا اباتتاندىرۋ ەمەس، بۇل — تۇرعىنداردىڭ دەنساۋلىعى مەن جايلى ومىرىنە سالىنعان ينۆەستيسيا. مۇنداي باستامالار ەكولوگيالىق مادەنيەتتى قالىپتاستىرىپ، تۇراقتى ءومىر سالتىن ناسيحاتتاۋعا ىقپال ەتەدى، — دەپ اتاپ ءوتتى الماتى وبلىستىق تۇرعىن ۇي-كوممۋنالدىق شارۋاشىلىعى جانە اباتتاندىرۋ باسقارماسىنىڭ قىزمەتكەرى.

وسى جۇمىس كۇزدە دە جالعاسىن تاپپاق. جىل سوڭىنا دەيىن وتىرعىزىلعان اعاشتار سانى 110 670-كە جەتكىزىلەدى دەپ جوسپارلانۋدا. اكسياعا تەك قانا كاسىپكەرلەر ەمەس، سونداي-اق، مەملەكەتتىك ورگاندار، ۆولونتەرلەر، وقۋشىلار، اۋدان مەن قالا تۇرعىندارى، اعا بۋىن وكىلدەرى، قوعامدىق ۇيىمدار، قازاقستان حالقى اسسامبلەياسىنىڭ مۇشەلەرى مەن جاستار بەلسەنە قاتىسۋدا.

ايتا كەتەيىك، الماتى وبلىسىنىڭ اكىمى مارات سۇلتانعازييەۆ بۇعان دەيىن ەكولوگيالىق باستامالاردىڭ كۇندەلىكتى ءومىردىڭ ءبىر بولىگىنە اينالۋى قاجەت ەكەنىن بىرنەشە رەت اتاپ وتكەن بولاتىن.

ال، «تازا قازاقستان» ەكولوگيالىق اكسياسى بىلتىر پرەزيدەنت قاسىم-جومارت توقايەۆتىڭ باستاماسىمەن تۇساۋىن كەسكەن ەدى. جوبا بارلىق ءوڭىردى قامتىدى. مەملەكەت باسشىسى «تازا قازاقستان» - كوشە تازالاۋدان الدەقايدا اۋقىمدى ۇعىم ەكەنىن ۇنەمى ايتىپ كەلەدى.