الماتىدا ايەلىن پىشاقتاپ ولتىرگەن پوليسەي قاندى قىلمىستى بالالارىنىڭ كوزىنشە جاساعان. كورشى-قولاڭدى شىرىلداپ كومەككە شاقىرعان دا سول كىشكەنتاي ۇل-قىزدار ەكەن دەپ حابارلايدى bairaqmedia.kz

قاندى وقيعا بولعان شۇعىلا ىقشاماۋدانىنداعى پاتەردىڭ ەسىگى ءقازىر مورلەنگەن. ال، كۇدىكتىنىڭ بەتى بەرى قاراپ، جانساقتاۋ بولىمىنەن پالاتاعا اۋىستىرىلىپتى. دارىگەرلەر ونىڭ دەنساۋلىعىن ورتاشا اۋىر دەپ باعالاپ وتىر. 

سوراقىسى سول، مۇنىڭ ءبارى كىشكەنتاي ۇل-قىزداردىڭ كوز الدىندا بولعان. ەرلى-زايىپتىنىڭ 3 بالاسى بار ەكەن. كورشىلەرىن كومەككە سولار شاقىرعان. 

شۋ بولدى ءۇي جاقتا جۇرگەن كەزىمىزدە. سوسىن كومەك سۇرادى كىشكەنتاي قىزدارى مەن ۇلكەن بالالارى. سونىمەن، ۇيدەن شىعىپ باردىم. بارسام، جاڭاعى جاعداي بولىپ جاتىر. پىشاقتاعان. 103 پەن 102 شاقىرىلدى. ولار 4-5 مينۋتتىڭ ىشىندە كەلىپ، ارى قاراي كومەك كورسەتۋ باستالدى، - دەدى كورشىلەردىڭ ءبىرى.

ال، كيكىلجىڭگە وتباسىلىق جانجال سەبەپ بولعان. كورشى-قولاڭ ولاردىڭ ءجيى ۇرىسقانىن، ال كۇدىكتىنىڭ ىشىمدىككە اۋەس بولعانىن ايتىپ وتىر.

بۇل ەر ادامنىڭ ءجيى ىشىمدىك ىشكەنى تۋرالى ءبىلدىم. ول پوليسيا قىزمەتكەرى بولعان. سول پاتەردە ۇنەمى توبەلەس بولاتىن. ياعني، ەرلى-زايىپتى ۇنەمى جانجالداسىپ جاتاتىن، - دەدى كوپقاباتتى ءۇيدىڭ تاعى ءبىر تۇرعىنى.

دەسە دە، رەسمي مالىمەتكە سۇيەنسەك، 39 جاستاعى كۇدىكتى سول كۇنى ساپ-ساۋ بولعان. ءقازىر پوليسەيلەر ءىستىڭ ءمان-جايىن انىقتاۋعا تىرىسۋدا. قىلمىستىق ءىس قوزعالعان. قاندى وقيعا  سەنبى تۇسكى ۋاقىتتا بولعان. ەر ادام ءوز پاتەرىندە ايەلىن پىشاقتاپ ولتىرگەن. كەيىن وز-وزىنە قول سالعان. ول ءتىرى قالدى. 

بەيرەسمي مالىمەت بويىنشا، قاندى قىلمىس جاساعان پوليسەي جۇمىستان شىعارىلماعان، ءتىپتى سەنبى كۇنى تۇستە تاۋلىكتىك كەزەكشىلىكتەن شىققان كورىنەدى. دەسە دە، الماتى قالالىق پوليسيا دەپارتامەنتى ونىڭ پوليسيادا قىزمەت ەتكەنىن راستاعانىمەن، بۇعان دەيىن جۇمىستان شىعارىلعان دەپ وتىر.