ۇكىمەت جەزقازعان قالاسىنىڭ جىلۋ جەلىلەرىن رەكونسترۋكسيالاۋ مەن جاڭعىرتۋعا 2،8 ملرد تەڭگەدەن استام قارجى ءبولدى، دەپ حابارلايدى Bairaqmedia.kz. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.

جەزقازعان قالاسى جىلۋ جەلىلەرىنىڭ ۇزىندىعى – 398 شاقىرىم. نىسان 1951 جىلى پايدالانۋعا بەرىلگەن، توزۋى – 56،6%. جىلۋ جەلىلەرى سەحىندا 1969 جىلى ىسكە قوسىلعان 8 سورعى ستانساسى بار. جىلىتۋ ماۋسىمىندا جىلۋ جەلىلەرىنىڭ توزۋى جىلۋمەن قامتۋعا كەرى اسەرىن تيگىزۋدە. رەسۋرستاردىڭ ايتارلىقتاي شىعىنى ورتا ەسەپپەن 35-40%-عا جەتەدى، بۇل قولدانىستاعى جانە سالىنىپ جاتقان نىسانداردى جىلۋ جەلىلەرىنە قوسۋعا مۇمكىندىك بەرمەيدى.

قالانىڭ كەڭەيۋىن جانە سالىنىپ جاتقان جاڭا باتىس اۋدانىن جىلۋمەن قامتاماسىز ەتۋ قاجەتتىلىگىن ەسكەرە وتىرىپ، باستاپقى جوبا تۇزەتىلدى: قۇبىرلاردىڭ ديامەترى 800 مم-دەن 1000 مم-گە دەيىن، ال رەكونسترۋكسيالاۋعا جاتاتىن جەلىلەردىڭ ۇزىندىعى 11،4 شاقىرىمنان 12،3 شاقىرىمعا دەيىن ۇلعايتىلدى.

 ۇكىمەت رەزەرۆىنەن بولىنگەن 2،8 ملرد تەڭگە جوبانى اياقتاۋعا جانە 98 مىڭنان استام تۇرعىنى بار قالانىڭ جىلۋ جەلىلەرىن ساپالى دايىنداۋعا مۇمكىندىك بەرەدى.