مەملەكەت باسشىسى قاسىم-جومارت توقايەۆ «بايتەرەك» ۇلتتىق باسقارۋشى حولدينگى» اق باسقارما ءتوراعاسى رۋستام ءقاراعويشيندى قابىلدادى، دەپ حابارلايدى Bairaqmedia.kz.

كەزدەسۋ بارىسىندا حولدينگتىڭ 2024 جىلعى قىزمەتىنىڭ قورىتىندىلارى مەن 2025 جىلعا ارنالعان جۇمىس جوسپارى تانىستىرىلدى.

رۋستام ءقاراعويشيننىڭ ايتۋىنشا، وتكەن جىلى حولدينگ 6 تريلليون تەڭگەگە جۋىق قارجىلاي قولداۋ كورسەتكەن. ونىڭ ىشىندە 4،1 تريلليون تەڭگە – ءىرى، ورتا جانە شاعىن بيزنەسكە، 1،9 تريلليون تەڭگە – تۇرعىن ءۇي قۇرىلىسى سالاسىنا باعىتتالعان.

حولدينگتىڭ اكتيۆتەرى 14،1 تريلليون تەڭگەگە جەتىپ، ينۆەستيسيالىق جانە نەسيە پورتفەلى 10،3 تريلليون تەڭگەگە دەيىن ۇلعايعان. 2024 جىعلى حولدينگتىڭ تازا تابىسى – 416 ميلليارد تەڭگە. بۇل قاراجات كومپانيالار توبى شەڭبەرىندەگى باعدارلامالاردى جۇزەگە اسىرۋعا جۇمسالماق.

سونداي-اق، پرەزيدەنتكە «دامۋ» كاسىپكەرلىكتى دامىتۋ قورىنىڭ بازاسىندا ەكى كەپىلدىك قورى قۇرىلعانى تۋرالى اقپارات بەرىلدى. ءبىرى – شاعىن جانە ورتا بيزنەستى، ەكىنشىسى – قۇنى 7 ميلليارد تەڭگەدەن اساتىن ءىرى جوبالاردى قارجىلاندىرۋعا ارنالعان.

قاسىم-جومارت توقايەۆقا شەتەلدىك سەرىكتەستەرمەن بىرلەسىپ اۋىل شارۋاشىلىعى، وڭدەۋ ونەركاسىبى جانە تاۋ-كەن مەتاللۋرگياسى سالالارىندا جوبالار ىسكە اسىرىلاتىنى، بۇل باستامالار «استانا» حالىقارالىق قارجى ورتالىعىنىڭ يۋريسديكسياسىندا قۇرىلاتىن قورلار ارقىلى جۇزەگە اساتىنى باياندالدى.

مەملەكەت باسشىسى ەكونوميكانىڭ تۇراقتى دامۋى ءۇشىن باستامالاردى ىسكە اسىرۋدىڭ ماڭىزدىلىعىن اتاپ ءوتتى. سونىمەن قاتار، «بايتەرەك» حولدينگىنە ەكىنشى دەڭگەيلى بانكتەرمەن بىرلەسە وتىرىپ، ناقتى سەكتوردى قارجىلاندىرۋدى جانە ەنەرگەتيكالىق، كوممۋنالدىق سەكتورلاردى جاڭعىرتۋ ۇلتتىق جوباسىن قارجىلاندىرۋ ماسەلەسىن شەشۋدى تاپسىردى.