مەملەكەت باسشىسى «ەگمونت» قارجىلىق بارلاۋ بولىمشەلەرى توبىنىڭ ءتوراعاسى ەلجبەتا فرانكوۆ-ياسكيەۆيچتى قابىلدادى، دەپ حابارلايدى Bairaqmedia.kz.
- كەزدەسۋ بارىسىندا اقشانى جىلىستاتۋعا جانە تەرروريزمدى قارجىلاندىرۋعا قارسى كۇرەس سالاسىنداعى حالىقارالىق ىنتىماقتاستىقتىڭ وزەكتى ماسەلەلەرى تالقىلاندى.
قاسىم-جومارت توقايەۆ جاھانداعى قارجىلىق قاۋىپسىزدىكتى نىعايتۋعا جانە اكتيۆتەردى قايتارۋ تيىمدىلىگىن ارتتىرۋعا ۇلەس قوسىپ جۇرگەن باستى حالىقارالىق پلاتفورما رەتىندە «ەگمونت» توبىنىڭ ماڭىزى زور ەكەنىنە نازار اۋداردى. سونداي-اق پرەزيدەنت قازاقستاننىڭ «اقشانى جىلىستاتۋعا قارسى» ۇلتتىق جۇيەسىن حالىقارالىق ستاندارتتارعا ساي ودان ءارى جەتىلدىرۋگە نيەتتى ەكەنىن راستاپ، زاڭ ۇستەمدىگىن قامتاماسىز ەتىپ، قوعامدىق قاۋىپسىزدىكتى نىعايتۋ ماقساتىندا «زاڭ جانە ءتارتىپ» تۇجىرىمداماسى قابىلدانعانىن جەتكىزدى.
ەلجبەتا فرانكوۆ-ياسكيەۆيچ قازاقستاندا جۇرگىزىلىپ جاتقان رەفورمالارعا جوعارى باعا بەرىپ، ونىڭ تيىمدىلىگىن اتاپ ءوتتى.
