ۋەفا چەمپيوندار ليگاسىنىڭ فينالدىق ماچى اياقتالدى. ماچتا «پسج» كومانداسى قارسىلاسىن 5:0 ەسەبىمەن جەڭىسكە جەتتى دەپ حابارلايدى bairaqmedia.kz

فينالدا «پسج» مەن «ينتەر» كوماندالارى كەزدەستى. ويىن ميۋنحەن قالاسىنداعى ستاديوندا ءوتتى.

12-مينۋتتا قورعاۋشى اشراف حاكيمي دەزيرە دۋەنىڭ پاسىنان كەيىن ەسەپ اشتى. 20-مينۋتتا دۋە ەسەپتى ەكى ەسە ۇلعايتتى. 63-مينۋتتا دەزيرە دۋە دۋبل جاساپ، «پسج» باسىمدىعىن ءىرى ەسەپكە جەتكىزدى. 73-مينۋتتا حۆيچا كۆاراسحەليا فرانسۋز كومانداسىنىڭ ءتورتىنشى گولىن سوقتى. 86-مينۋتتا جارتىلاي قورعاۋشى سەنني مايۋلۋ سوڭعى ناتيجەنى بەكىتىپ، ەسەپتى 5:0-گە جەتكىزدى.

ءسويتىپ، «پسج» العاش رەت ەۋروپانىڭ باستى كلۋبتىق تروفەيىندە تاريحي جەڭىسكە جەتتى.

فينالدان كەيىن پاريجدە فرانسۋز جانكۇيەرلەرى تارتىپسىزدىك ۇيىمداستىردى. ب ا ق اقپاراتىنا سۇيەنسەك، بۇلىك نەگىزىنەن قالانىڭ ورتالىق بولىگىندە ورىن العان.

شامامەن ەلۋگە جۋىق ادام اۆتوبۋستىڭ ارتقى تەرەزەسىن سىندىرىپ، كولىككە زاقىم كەلتىرگەن.

بۇدان بولەك ەليسەي الاڭىندا ءبىر اۆتوكولىككە وت قويىلعان. الايدا ءورت سوندىرۋشىلەر دەر كەزىندە كەلىپ، جالىندى باقىلاۋعا العان.

سونىمەن قاتار، بىرنەشە ادام اياق كيىم دۇكەنىنە باسىپ كىرگەنى حابارلانسا، پورت-دە-سەن-كلۋ اۋدانىندا ەكى اۆتوكولىك ورتەنىپ كەتكەن. پوليسيا ءتارتىپتى قالپىنا كەلتىرۋ ءۇشىن كوزدەن جاس اعىزاتىن گاز قولدانۋعا ءماجبۇر بولعان.

سوڭعى دەرەك بويىنشا، پاريجدە جالپى سانى 294 ادام ۇستالعان.