يراننىڭ زىمىران شابۋىلى سالدارىنان يزرايلدەگى كولەمى جاعىنان ءۇشىنشى اۋرۋحانا - بەەر-شيەۆا قالاسىنداعى «سوروكا» اۋرۋحاناسىنا ايتارلىقتاي زاقىم كەلدى، دەپ حابارلايدى bairaqmedia.kz.

يزرايل بيلىگىنىڭ مالىمەتىنشە، اۋرۋحانادا ەم الىپ جاتقان 71 ادام جاراقات العان. اۋرۋحانانى ارالاپ شىققاننان كەيىن ءيزرايلدىڭ قورعانىس ءمينيسترى ەلىنىڭ يراننىڭ جوعارعى كوشباسشىسى اياتوللا ءالي حامەنەيدى زاڭدى نىسانا دەپ سانايتىنىن مالىمدەدى. الايدا يران اۋرۋحانانىڭ ەمەس، ونىڭ جانىندا ورنالاسقان اسكەري نىساننىڭ كوزدەلگەنىن العا تارتۋدا.

يزرايل قورعانىس ءمينيسترى يسراەل كاس يراننىڭ جوعارعى كوشباسشىسى اياتوللا ءالي حامەنەيگە تىكەلەي ەسكەرتۋ جاسادى.

«بۇل ادام (حامەنەي) ءتىرى قالماۋى ءتيىس. يزرايل ارمياسى ءتيىستى تاپسىرما الدى. ءبىز حامەنەيدىڭ كوزىن جويۋ ارقىلى ماقساتقا جەتۋدى كوزدەيمىز»، – دەدى كاس.

AFP اگەنتتىگىنىڭ حابارلاۋىنشا، شابۋىل حيرۋرگيا بولىمىنە تيگەن، ول جەردەن ادامدار ەۆاكۋاسيالانعان. كۋاگەرلەردىڭ ايتۋىنشا، شابۋىلدان كەيىن اۋرۋحانا ۇستىنەن ءتۇتىن كوتەرىلگەن. BBC تىلشىلەرى بۇل اۋداندا ۇلكەن قيراۋ بولعانىن، اۋادا ۇزاق ۋاقىت بويى ءتۇتىن ىركىلىپ تۇرعانىن حابارلادى.

اۋرۋحانا اكىمشىلىگىنىڭ مالىمدەۋىنشە، عيماراتتاردىڭ ءبىرى ورتەنىپ كەتكەن.

«بىرنەشە بولىمشە تولىقتاي قيرادى، اۋرۋحاناعا ەلەۋلى زالال كەلدى - بۇكىل مەديسينالىق ورتالىق بويىنشا عيماراتتارعا، قۇرىلىمدارعا، تەرەزەلەر مەن توبەلەرگە زاقىم كەلگەن»، - دەدى اۋرۋحانا ديرەكتورى شلومي كوديش جۋرناليستەرگە.

قازاقستان يراننان ءوز ازاماتتارىن ەۆاكۋاسيالاپ جاتىر

تاياۋ شىعىستاعى قارقىندى شيەلەنىسكەن جاعدايدا قازاقستان رەسپۋبليكاسى ءوز ازاماتتارىن يران يسلام رەسپۋبليكاسىنىڭ اۋماعىنان ەۆاكۋاسيالاۋدى جەدەل ۇيىمداستىردى. بۇل تۋرالى سىرتقى ىستەر مينيسترلىگىنىڭ باسپا ءسوز قىزمەتى حابارلادى.

ۇيلەسىمدى جۇمىس پەن ۆەدومستۆوارالىق ءوزارا ءىس-قيمىلدىڭ جوعارى دەڭگەيىنىڭ ارقاسىندا قازاقستاننىڭ سىرتقى ىستەر مينيسترلىگى، قۇزىرەتتى مەملەكەتتىك ورگاندارى مەن شەتەلدەگى ديپلوماتيالىق وكىلدىكتەرى 109 وتانداسىمىزدى ەلگە قايتاردى.

ەۆاكۋاسيا ءوڭىردىڭ دوستاس مەملەكەتتەرىنىڭ اۋماقتارى ارقىلى ترانزيتپەن جۇزەگە اسىرىلدى، اتاپ ايتقاندا 89 ادام يراننان تۇرىكمەنستان ارقىلى جانە 20 ادام ازەربايجان ارقىلى ءوتتى. بارلىق ازاماتتارعا كونسۋلدىق-قۇقىقتىق كومەك كورسەتىلدى جانە وتانعا ورالۋ ءۇشىن قاجەتتى جاعداي جاسالدى.

سىرتقى ىستەر مينيسترلىگى يران، تۇرىكمەنستان جانە ازەربايجان بيلىگىنە قازاقستاندىقتاردىڭ بۇكىل باعىتى بويىنشا ءقاۋىپسىز جانە ۋاقتىلى ءوتۋىن قامتاماسىز ەتۋدە ماڭىزدى ءرول اتقارعان كومەك پەن ناتيجەلى ءوزارا ءىس-قيمىل كورسەتكەنى ءۇشىن ريزاشىلىعىن بىلدىرەدى.

ەۆاكۋاسيالىق ءىس-شارالاردى دايىنداۋ جانە وتكىزۋ بارىسىندا قازاقستاندىق ديپلوماتتار تاۋلىك بويى جەرگىلىكتى بيلىكپەن ءىس-قيمىلدى ۇيلەستىرىپ، مارشرۋتتاردىڭ لوگيستيكاسىن قامتاماسىز ەتتى، سونداي-اق قۇزىرەتتى ورگاندارمەن ءوزارا ءىس-قيمىل جاسادى جانە وتانداستارىمىزعا قاجەتتى قولداۋ كورسەتتى. قىسقا مەرزىمدە 200-دەن استام ازاماتىمىز حابارلاسىپ، ولارعا كومەك كورسەتىلدى. يرانداعى بارلىق قازاقستاندىقتارمەن ۇزدىكسىز بايلانىس ورناتىلىپ، ولاردىڭ الدىن الا كەلىسىلگەن ترانزيتتىك باعىتتارى بويىنشا ءجۇرىپ-تۇرۋى ۇيىمداستىرىلدى.