الەۋمەتتىك جەلىدە ايدانا ەسىمدى ايەل پرەزيدەنت پەن قورعانىس مينيسترىنە ۇندەۋ جولداپ، اسكەريلەردىڭ الەۋمەتتىك جاعدايىنا قاتىستى ماسەلە كوتەردى، دەپ حابارلايدى bairaqmedia.kz.

ايدانانىڭ ايتۋىنشا، كۇيەۋى بەس جىلىن ساربازدىق جولعا ارناپ، وفيسەر اتانعان. قىزمەت بارىسىندا مايور شەنىن العانىمەن، ەڭبەكاقىسى وتباسىن اسىراۋعا جەتپەي وتىر.

«كۇيەۋىم وفيسەر بولۋ ءۇشىن بەس جىل وقىدى. وسى ۋاقىتقا دەيىن العان ايلىعىن ايتۋعا ۇيالاتىنمىن. قولعا 270 مىڭ تەڭگە تيسە، ول مايور بولعان سوڭ 320 مىڭ تەڭگەگە كوتەرىلدى. ءبىراق پاتەردىڭ وزىنە كوممۋنالدىق تولەمىمەن 150 مىڭ تەڭگە تولەيمىز. قالعانى كۇندەلىكتى شىعىنعا ارەڭ جەتەدى. ءقازىر پاتەرگە بەرىلەتىن وتەماقىنى توقتاتتى. ءبىز ءۇشىن بۇل – ناعىز سوققى»، – دەيدى ول.

ايدانا وتباسىنداعى اۋىر جاعدايدى ەگجەي-تەگجەيلى باياندادى. ونىڭ سوزىنشە، مايور ەرتەڭگىسىن جۇمىستان كەلسە، ارتىنشا قايتادان قىزمەتكە شىعادى. بالالارى اكەسىن سيرەك كورەدى، ال دەنساۋلىعى سىر بەرىپ جاتىر.

«كۇيەۋىم كۇن ارالاتىپ جۇمىستا. ءبىر تاۋلىككە كەتسە، ەرتەڭىندە ۇيگە كەلەدى. بيشارا، ۇيىقتاي دا المايدى، بالا-شاعا بار. ارتىنشا تاعى جۇمىسقا جەگىلەدى. ول وسىلايشا دەنساۋلىعىن قۇرتىپ بارادى. ءبىز التىندارىمىزدى ساتىپ كۇن كورۋگە ءماجبۇرمىز. تاماقتىڭ، ەتتىڭ باعاسىن بىلەسىزدەر. بالالارىمىزدى قالاي كيىندىرەمىز؟ اسكەريلەردەن باسقا ەشكىم جوق پا؟ بۇل ادىلدىك پە؟» – دەپ اشىنادى ول.