تۇركىستان وبلىسىنا قاراستى ءشامشى قالداياقوۆ اتىنداعى وبلىستىق فيلارمونيادا ىشكى داۋ تۋىندادى. ءانشى، قازاقستان رەسپۋبليكاسىنىڭ «ەرەن ەڭبەگى ءۇشىن» مەدالىنىڭ يەگەرى ناركەنجە سەرىكبايەۆا فيلارمونيا ديرەكتورى عالىمجان ەرنازاروۆقا قاتىستى الەۋمەتتىك جەلىدە سىني جازبا جاريالاپ، انايى ۇسىنىس جاسادى دەپ ايىپتادى. وقيعا قوعام نازارىن اۋدارىپ، داۋ كەڭىنەن تالقىلانا باستادى.
وسىعان بايلانىستى فيلارمونيا ديرەكتورى عالىمجان ەرنازاروۆ الەۋمەتتىك جەلىدەگى فيلارمونيانىڭ رەسمي پاراقشاسى ارقىلى مالىمدەمە جاساپ، وزىنە تاعىلعان ايىپتاۋلاردى جوققا شىعاردى. ول بۇل جاعدايعا قاتىستى زاڭ اياسىندا ارەكەت ەتىپ جاتقانىن جانە سوتقا شاعىم تۇسىرگەنىن جەتكىزدى، دەپ جازادى azattyq-ruhy.kz.
«كەشەگى الەۋمەتتىك جەلىدە تاراپ جاتقان ۆيدەو بويىنشا مەن دە ءوز جاۋابىمدى بەرگىم كەلەدى. مەن – وتباسىلى ازاماتپىن، انام بار. ماعان جانە وتباسىمنىڭ اتىنا قارا كۇيە جاعىلىپ جاتىر. بۇل ماسەلەدە مەنى دە زاڭ قورعايدى دەپ ويلايمىن. سوتقا شاعىمداندىم. سوتتىڭ شەشىمىن كۇتەيىك. سودان كەيىن بارلىق الەۋمەتتىك جەلىلەردە جاريا ەتەمىز»، – دەدى ەرنازاروۆ.
سونداي-اق، ول ناركەنجە سەرىكبايەۆانىڭ «جۇمىستان قۋدالاۋ» تۋرالى مالىمدەمەسىنە جاۋاپ بەردى. ديرەكتوردىڭ ايتۋىنشا، سەرىكبايەۆا ۇزاق ۋاقىت بويى جۇمىسقا كەلمەگەنىمەن، فيلارمونيا ۇجىمى وعان جاناشىرلىق تانىتىپ، قىزمەتتەن بوساتۋعا اسىقپاعان.
«سىزدەر ونىڭ الەۋمەتتىك جەلىدەگى پاراقشاسىنان كورىپ وتىرسىزدار، ءبىر كۇنى جەزقازعاندا، ءبىر كۇنى قىزىلوردادا تويدا جۇرەدى. ول مۇلدە جۇمىسقا كەلمەيدى. ءبىزدىڭ قاتەلىگىمىز – جۇمىستا بولماعانى ءۇشىن قىزمەتىنەن بوساتۋ كەرەك بولعاندا دا جاناشىرلىق تانىتقانىمىز ەدى»، – دەدى ول.
سونىمەن قاتار، ەرنازاروۆ ءانشىنىڭ ءوز ماماندىعىنا قاتىستى ايتقان سىنىنا دا توقتالىپ ءوتتى.
«ماماندىعىم سايكەس بولعاندىقتان جانە ونەرگە جاناشىر بولعان سوڭ، بۇل قىزمەتتى اتقارىپ وتىرمىن. شەتەلگە ءىسساپارلار رەسمي نەگىزدە جۇزەگە اسادى: ەلشى حاتى، باسقارمانىڭ رۇقساتى بولادى. بۇل قاراجاتتى بوسقا شاشۋ ەمەس. استانا كۇنىن اتاپ ءوتۋ ماقساتىندا ۇيىمداستىرىلعان ءىسساپار»، – دەپ ءتۇسىندىردى فيلارمونيا باسشىسى.
ەسكە سالا كەتەيىك، بۇعان دەيىن ءانشى ناركەنجە سەرىكبايەۆا الەۋمەتتىك جەلىدە ۆيدەو جاريالاپ، فيلارمونيا ديرەكتورى تاراپىنان انايى ۇسىنىس ەستىگەنىن، سونداي-اق جۇمىستان شەتتەتىلىپ جاتقانىن ايتقان بولاتىن. قازىرگى ۋاقىتتا بۇل داۋعا قاتىستى ماسەلە سوتتا قارالىپ جاتىر.
