بۇگىن تاڭنان 7 جاسار ايزەرەنىڭ ءۇيىنىڭ الدىندا ادام كوپ. جەرلەۋ راسىمىندە قارا جامىلعان وتباسىنىڭ تۋىستارىنان بولەك، تىلشىلەر، جەدەل جاردەم قىزمەتكەرلەرى دە ءجۇر دەپ حابارلايدى bairaqmedia.kz

قايعىدان قان جۇتقان وتباسى باستاپقىدا جانازاعا تىلشىلەردىڭ قاتىسۋىنا قارسى بولعانىمەن، كەيىن ءبىر اۋىزدان رۇقسات بەردى. ولار ەكىنشى سىنىپ وقۋشىسىنىڭ قازاسىنا كىنالىلەردىڭ ءتيىستى جازاعا تارتىلۋىن تالاپ ەتۋدە.

مارقۇمنىڭ تۋىستارىنىڭ ءبىرى ونىڭ الدىنان جىلدامدىقپەن وتكەن اۆتوبۋس جۇرگىزۋشىسى دە كىنالى دەپ ەسەپتەيدى. سودان قورقىپ، قىز ارتقا قاراي جۇرگەن دەيدى ول. ءسويتىپ، جۇك كولىگىنىڭ استىندا قالعان. 

اۆتوبۋس جۇرگىزۋشىسىنىڭ جازالانۋىن سۇرايمىز. ول ولىممەن اياقتالعان جول اپاتىنا سەبەپ بولدى. جوعارى جىلدامدىقپەن جۇيتكىپ كەلە جاتقانىنان بالا قورقىپ، ارتقا قاراي شەگىندى، - دەدى كوزىنە جاس العان مارقۇمنىڭ تۋىس اعاسى.

مۇنداي اپات وسى جاياۋ جۇرگىنشىلەر جولاعىندا ءبىرىنشى رەت بولىپ وتىرعان جوق دەيدى جەرگىلىكتى تۇرعىندار. 

ايتا كەتەيىك، مارقۇم وتباسىنداعى 4 بالانىڭ ءۇشىنشىسى بولعان. ياعني، ەكى اپكەسى مەن ءىنىسى بار ەكەن.

ەسكە سالايىق، قايعىلى وقيعا كەشە ساعات 12:17-دە الماتى قالاسىنىڭ قاراسۋ ىقشاماۋدانىندا بولدى. بۇرىنداي كوشەسىمەن كەلە جاتقان Renault جۇك كولىگى نوۆوە كوشەسىنىڭ قيىلىسىندا جاياۋ جۇرگىنشىلەر جولاعىمەن ءوتىپ بارا جاتقان وقۋشىنى قاعىپ كەتكەن. بالا العان جاراقاتتارىنان سول جەردە كوز جۇمدى. جۇك كولىگىنىڭ جۇرگىزۋشىسى ۇستالىپ، ۇستىنەن قىلمىستىق ءىس قوزعالدى. قايعىلى وقيعا ايزەرە يبرايەۆانىڭ اناسىنىڭ كوز الدىندا بولعان. قوسىمشادان كەلە جاتقان قىزىن ول جولدىڭ ارعى بەتىندە كۇتىپ تۇرعان ەكەن.