كورشىنىڭ كەسىرىنەن ساسىق يىسكە ۋلانىپ وتىر. الماتىدا جالعىزباستى ايەل ءبىر بولمەلى پاتەردە قويان اسىراپ، ماڭايىنىڭ مازاسىن قاشىرعان. قويان بولعاندا دا بىرەۋ ەمەس، باقانداي — 139-ىن، دەپ حابارلايدى كتك ارناسىنا سىلتەمە جاساپ bairaqmedia.kz

قوراعا اينالعان پاتەردە تازالىق، ارينە، اتىمەن جوق. جۇرت ەسىك-تەرەزەنى اشپاق تۇگىل، اۋلادا ەركىن تىنىستاۋدان قالىپتى. ءۇش جىلعى ارپالىس ۇلكەن ايقايدان سوڭ عانا اياقتالدى.

ساسىق يىسكە تۇنشىققان، اشۋعا بۋلىققان جۇرتتىڭ جالعىزباستى كورشى ايەلگە وكپەسى قارا قازانداي. ءۇش جىلدان بەرى اياداي جەرگە قويان باعادى. سايكەسىنشە، تازالىق اتاۋلى مۇلدەم جوق. سونىڭ سالدارىنان اۋلانى ساسىق ءيىس باسىپ قالعان.

تازالىق جوق. ءبارىمىز اۋىرىپ جاتىرمىز. مەن ءوزىم اللەرگيا بولدىم. جوعارعىدا تۇراتىندار استمامەن اۋىرادى. بالالار تۇگەل اۋرۋ. ءۇش جىلدان بەرى ءبارىمىز اۋىرىپ قالدىق. ءۇش جىل بويى سويلەستىك. بىزدەن قاشادى. ەسىگىن اشپايدى، - دەدى ساۋلە نۇرتازينا ەسىمدى كورشىسى.

مۇڭكىگەن ءيىستى ايتىپ كورشىلەردىڭ ارىزدانىپ بارماعان جەرى جوق. وسى ۋاقىتتا قويان باسى ارتپاسا، ازايماعان. سوراقىسى — قوياندارمەن بىرگە ونىڭ ولەكسەسى دە ءۇيدىڭ ىشىندە جاتىر. شىعارىلماعان قوقىس ءوز الدىنا. اقىرى ىسكە پوليسەيلەر ارالاسىپ، قويان دا اكەتىلدى، جۇيكە جۇيەسىندە اقاۋى بار يەسى دە اۋرۋحاناعا جونەلتىلدى.

وقيعا ورنىنا بارعاندا اتالعان پاتەردە ءۇي جانۋارلارىنىڭ كوپ مولشەردە جانە ءتيىستى تالاپتارعا ساي كەلمەيتىن جاعدايدا ۇستالىپ جاتقانى بەلگىلى بولدى. بۇل جاعداي سانيتاريا-ەپيدەميولوگيا قاۋپىنە قاتەر توندىرگەن. اكىمدىك، مەديسينالىق قىزمەت وكىلدەرى جانە ەرىكتىلەردىڭ قاتىسۋىمەن كەشەندى جۇمىس جۇرگىزىلدى، پاتەر يەسى مەديسينالىق كومەك كورسەتۋ ءۇشىن دارىگەرلەرگە تاپسىرىلدى، - دەپ مالىمدەدى الماتى قالالىق پد رەسمي وكىلى سالتانات ازىربەك.

قوياندار اكەتىلگەنىمەن، ءيىس قالدى. ەندى ارنايى ماماندار الداعى ۋاقىتتا پاتەرگە سانيتارلىق تازارتۋ جۇمىسىن جۇرگىزبەك.