الماتى وبلىسىندا قازاقستان حالىقتارىنىڭ بىرلىگى كۇنىنە وراي اۋقىمدى مەرەكەلىك ءىس-شارالار ۇيىمداستىرىلدى دەپ حابارلايدى bairaqmedia.kz

قونايەۆ قالاسىنىڭ شەتىندە جاڭا جاسىل بەلدەۋ ىرگەتاسى قالاندى. جوبانىڭ ماقساتى – كومىرتەك ءىزىن ازايتىپ، تۇراقتى ورمان ەكوجۇيەسىن قالىپتاستىرۋ.

ال، قالا ورتالىعىنداعى الاڭدا ەتنومادەني كورمە ۇيىمداستىرىلدى. قازاق، شەشەن-ينگۋش، كارىس، تاتار-باشقۇرت، ورىس، ۇيعىر، تۇرىك جانە تاجىك دياسپورالارىنىڭ وكىلدەرى ۇلتتىق تاعامدارىن، قولونەر بۇيىمدارىن ۇسىنىپ، «اۋىل شەبەرلەرى» ەتنوايماعىندا شەبەرلىك ساباقتارىن وتكىزدى.

الماتى وبلىسىنىڭ اكىمى مارات سۇلتانعازييەۆ جينالعان قاۋىمدى قۇتتىقتادى.

سىزدەردى قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن! بۇل مەرەكە – دوستىقتىڭ، ءوزارا تۇسىنىستىك پەن كەلىسىمنىڭ نىشانى. «بىرلىك بار جەردە – تىرلىك بار» دەيدى حالقىمىز. ەتنوستار اراسىنداعى اۋىزبىرشىلىك پەن سىيلاستىقتىڭ ارقاسىندا ەلىمىز دامىپ، العا باسىپ كەلەدى. قازاقستاننىڭ باستى جەتىستىگى – ۇلتارالىق كەلىسىم. ءبىز ونى ساقتاپ، نىعايتا ءبىلۋىمىز كەرەك، – دەدى الماتى وبلىسىنىڭ اكىمى مارات سۇلتانعازييەۆ.

سونداي-اق، ءوڭىر باسشىسى قازاقستان حالقى اسسامبلەياسىنىڭ 30 جىلدىعىنا ارنالعان مەرەيتويلىق مەدالداردى سالتاناتتى تۇردە تابىستادى. بۇل ماراپاتتى 17 ەتنومادەني بىرلەستىكتىڭ بەلسەندى مۇشەسى يەلەندى.

وڭىردە ۇلتتىق كيىمدەر شەرۋى، سونداي-اق، ب.سوقپاقبايەۆ اتىنداعى ساياباقتا «بىرلىك جۇگىرۋى» ۇيىمداستىرىلدى. سپورتتىق باستاماعا 300-گە جۋىق ادام قاتىستى.

قازاقستان حالقىنىڭ بىرلىگى كۇنىنە جانە «تازا قازاقستان» مەملەكەتتىك اكسياسى اياسىندا شەڭگەلدى اۋىلىندا 10 مىڭ اعاش وتىرعىزىلعانىن دا ايتا كەتەيىك.