اقتاۋلىق ەرلى-زايىپتى، ياعني، تانىمال ءانشى اباي بەگەيدىڭ قىزى گۇلەركەم نيازقۇلوۆا كۇيەۋىمەن بىرگە Instagram، TikTok جانە Telegram جەلىلەرىندە 850 مىڭنان استام وقىرماندارىنىڭ اراسىندا اۋقىمدى ونلاين-لوتەرەيالار ۇيىمداستىرعانى ءۇشىن ءىستى بولىپ جاتىر، دەپ حابارلايدى bairaqmedia.kz
قارجىلىق مونيتورينگ اگەنتتىگىنىڭ مالىمەتىنشە، بۇل لوتەرەيالارعا 1 800-دەن استام ازامات قاتىسقان. زاڭسىز قىزمەت ارقىلى تاپقان قىلمىستىق تابىس كولەمى 162 ملن تەڭگەدەن اسقانى انىقتالدى.
لوتەرەيا وپەراتورى رەتىندە تىركەلمەگەنىنە قاراماستان، ولار اۆتوكولىك، پاتەر جانە باسقا دا باعالى جۇلدەلەر ويناتقان. قاتىسۋشىلار قۇنى 500-دەن 50 000 تەڭگەنى قۇرايتىن بيلەت (سيفرلىق ءنومىر) ساتىپ الىپ وتىرعان، — دەلىنگەن حابارلامادا.
تەرگەۋ مالىمەتتەرىنە سايكەس، ءقازىر كۇدىكتىلەردىڭ مۇلكى مەن بانك شوتتارىنا تىيىم سالىندى. سوتقا دەيىنگى تەرگەۋ جالعاسىپ جاتىر.
Azattyq Rýhy پورتالىنىڭ اقپاراتىنا سايكەس، ۇتىس ويناتاتىن Instagram پاراقشاسىن 2022 جىلدان بەرى بەلسەندى جۇرگىزىپ كەلە جاتقان گۇلەركەم نيازقۇلوۆا زاڭسىز ارەكەتتەرى ءۇشىن 2024 جىلى 1 107 600 تەڭگە ايىپپۇل تولەگەن. ونىڭ ۇتىس ويىندارىن وتكىزۋشە ەشقانداي قۇقىعى جوعى انىقتالدى.
«اتالعان پاراقشانىڭ يەسى نيازقۇلوۆا گۇلەركەم ابايقىزىنا قاتىستى «لوتەرەيالار جانە لوتەرەيا قىزمەتى تۋرالى» قازاقستان رەسپۋبليكاسى زاڭىنىڭ 5-بابىنىڭ 4، 5-تارماقتارىندا بەلگىلەنگەن تالاپتاردى بۇزۋى بويىنشا 2024 جىلعى 24 مامىرداعى №15 اكىمشىلىك قۇقىق بۇزۋشىلىق تۋرالى حاتتاما تولتىرىلىپ، ماڭعىستاۋ وبلىسى مۇنايلى اۋداندىق سوتىنىڭ 2024 جىلعى 8 تامىزداعى قاۋلىسىمەن اتالعان تۇلعا ءتيىستى اكىمشىلىك جاۋاپتىلىققا تارتىلىپ، وعان 1 107 600 تەنگە ايىپپۇل سالىنعان»، - دەپ حابارلادى كوميتەتتەن.
ەلىمىزدە 15 جىل مەرزىمگە لوتەرەيا وتكىزۋ قۇقىعى بەرىلگەن جالعىز وپەراتور - «ءساتتى جۇلدىز» اق بولىپ بەكىتىلگەن. «ءساتتى جۇلدىز» «Instagram» الەۋمەتتىك جەلىسىندەگى «@erke_rezerve (Niyazkulova Erke)» لوتەرەيا اگەنتى ەمەس ەكەنىن راستادى. اباي بەگەيدىڭ قىزى لوتورەيا وپەراتورىمەن شارت جاساسپاعان.
ال زاڭنىڭ 5-بابىنىڭ 4) جانە 5) تارماقتارىنا سايكەس، لوتەرەيا وپەراتورى ەمەس تۇلعانىڭ لوتەرەيا وتكىزۋىنە جانە لوتەرەيا وپەراتورى نەمەسە لوتەرەيا اگەنتى ەمەس تۇلعانىڭ لوتەرەيا بيلەتتەرىن، ەلەكتروندىق لوتەرەيا بيلەتتەرىن تاراتۋىنا (وتكىزۋىنە) تىيىم سالىنعان.
زاڭنامانى بۇزعان بلوگەرگە سول ءۇشىن دە «ۇتىس ويىندارىندا كورسەتىپ جۇرگەن بۋما-بۋما اقشاسىنان الدەقايدا كەم» ايىپپۇل سالىنعان.
