اقش پرەزيدەنتى دونالد ترامپ يزرايل مەن يران اراسىنداعى 12 كۇنگە سوزىلعان اسكەري قاقتىعىستى «تولىق جانە تۇپكىلىكتى توقتاتۋ» تۋرالى كەلىسىمگە قول جەتكىزىلگەنىن جاريالادى. بۇل تۋرالى ول Truth Social جەلىسىندەگى رەسمي پاراقشاسىندا جازدى، دەپ حابارلايدى Bairaqmedia.kz.

«ەگەر ءبارى جوسپارعا ساي جۇزەگە اسسا – بۇل تاريحتا قالادى. مەن يزرايل مەن يراندى وسى «ون ەكى كۇندىك سوعىستى» توقتاتۋعا مۇمكىندىك بەرگەن توزىمدىلىك پەن پاراساتتىلىق ءۇشىن قۇتتىقتايمىن»، – دەپ جازدى اقش پرەزيدەنتى.

كەلىسىم قالاي جاسالدى؟

اتىستى توقتاتۋ تۋرالى كەلىسىمگە اقش پەن قاتاردىڭ بىرلەسكەن دەلدالدىعى ارقىلى قول جەتكىزىلگەن. كەلىسىمگە دەيىن ترامپ پەن يزرايل پرەمەر-مينيسترى بينيامين نەتانياحۋ تەلەفون ارقىلى سويلەسكەن.

ال يران تاراپى كەلىسىمگە قاتار پرەمەر-مينيسترى شەيح مۇحامماد بين ابدۋلراحمان ءال-تاني جانە يران بيلىگىمەن بولعان بايلانىس ناتيجەسىندە كەلىستى. كەلىسسوزدەرگە اقش ۆيسە-پرەزيدەنتى دجەي دي ۆەنس، مەملەكەتتىك حاتشى ماركو رۋبيو، سونداي-اق تاياۋ شىعىس جونىندەگى ارنايى وكىل ستيۆ ۋيتكوفف قاتىسقان.

اتىستى توقتاتۋ قالاي ىسكە اسادى؟

• قارسى تاراپتار التى ساعات ىشىندە بارلىق اسكەري وپەراسيالاردى توقتاتۋعا ءتيىس.

• تولىق اتىستى توقتاتۋ كەلەسى 24 ساعاتتا جۇزەگە اسادى.

• يران اتىستى توقتاتۋدى دەرەۋ باستايدى، ال يزرايل 12 ساعاتتان كەيىن قوسىلادى.

بۇل – تاياۋ شىعىستاعى ەڭ ءقاۋىپتى اسكەري شيەلەنىستەردىڭ ءبىرى بولعان وسى قاقتىعىستى توقتاتۋعا باعىتتالعان العاشقى ناقتى ديپلوماتيالىق قادام.

تاراپتاردىڭ كەلىسىمدى تولىققاندى ورىنداۋى وڭىردەگى تۇراقتىلىق پەن جاھاندىق قاۋىپسىزدىك ءۇشىن ماڭىزدى بولماق.