Air India áýe kompanıasynyń Londonǵa baǵyt alǵan jolda apatqa ushyraǵan Boeing 787-8 Dreamliner ushaǵynda bir otbasy túgel qaza tapty, dep habarlaıdy bairaqmedia.kz.
Erli-zaıypty dárigerler Pratık Djoshı men Komı Vás jáne olardyń úsh balasy shetelde jańa ómir bastaý úshin Londonǵa baǵyt alǵan edi. Alaıda bir otbasy mingen ushaq Ahmadabadtan ushqannan keıin nebári 32 sekýndtan soń apatqa ushyrady. Otbasynyń ushaqta túsken sońǵy sýreti jelide tarap ketti.
M.economictimes.com basylymynyń jazýynsha, dáriger Pratık Djoshı Londonda alty jyl turyp, onda mansabyn qalyptastyryp, otbasy úshin jarqyn bolashaqqa jaǵdaı jasaǵan. Al onyń jubaıy, dáriger Komı Vás — Ýdaıpýr qalasyndaǵy bedeldi Pacific aýrýhanasynda qyzmet etken qurmetti dáriger. Komı Vás saparǵa shyǵarda eki kún buryn ǵana jumysynan shyǵyp, kúıeýiniń janyna, Londonǵa kóship, jańa ómir bastamaq edi. Olardyń balalary — bes jastaǵy egiz uldary Nakýl men Pradút jáne segiz jastaǵy qyzdary Mıraııa da sapar aldynda alańsyz edi. Alaıda jantúrshigerlik ushaq apaty bir otbasy músheleriniń ómirin qıdy.
Marqum dárigerlerdiń kórshileri men dostary erli-zaıyptyny tek kásibıligi úshin ǵana emes, sondaı-aq olardyń meıirimdiligi men zamanaýı kózqarastary úshin de erekshe qurmettegen. Otbasyǵa jaqyn dosy "Búkil qala qaıǵy jutyp otyr. Júrekteri jyly, armanshyl jup balalaryna eń jaqsyny berýge tyrysatyn” dedi News18 basylymyna bergen suhbatynda.
Taǵy oqyńyz: «Esimdi jıǵanda aınalamda máıitter jatty»: 242 jolaýshysy bar ushaq apatynan bir adam ǵana tiri qaldy
Apatqa ushynraǵan Dreamliner ushaǵynda túsken sýretten ózderin ne kútip turǵanynan beıhabar erli-zaıypty men balalardyń kúlimdep otyrǵanyn kórýge bolady.
Avıasıa sarapshylarynyń aıtýynsha, Air India áýe kompanıasynyń AI-171 reısi áýege kóterilgen soń bar bolǵany 32 sekýnd ushyp úlgerip, sodan keıin baqylaýdan shyǵyp, bıiktigin joǵalta bastaǵan. Saǵat 13:38-de Ahmadabadtaǵy Meganı Nagar mańynda qulaǵan. Kýágerler ushaq áýege áreń kóterilgenin baıqaǵan. Alǵashqy málimetterge sensek, qozǵaltqyshtar qajetti tartylys kúshin ala almaǵan.
Bul ushaqta 230 jolaýshy men 12 ekıpaj múshesi bolǵan.
Bılik apattyń sebepterin zertteýdi jalǵastyryp jatyr. Alaıda ushaqtaǵy sońǵy selfı bútin halyqtyń orny tolmas qasiretiniń sımvolyna aınaldy.
