Almaty oblysy İle aýdanynyń turǵyndary oblys ákimi Marat Sultanǵazıevpen ótken eseptik kezdesýde óńirdiń ózekti máselelerin kóterdi, - dep habarlaıdy bairaqmedia.kz
İs shara 17 qazanda Ótegen batyr aýylyndaǵy Mádenıet úıinde ótti. Almaty oblysy turaqty ekonomıkalyq ósim kórsetip, elimizdegi kóshbasshy aımaqtardyń qataryna endi. Sońǵy úsh jylda óńirdiń jalpy ishki ónimi eki esege jýyq ósip, 3,4 trln teńgeden 6 trln teńgege jetti. Nátıjesinde oblys respýblıka boıynsha úzdik bestikke kirip otyr.
Biz elimiz boıynsha jalpy ishki ónimge qosqan úles jaǵynan 10-orynnan 5-orynǵa kóterildik. Óńir ekonomıkasy 10 paıyzdan astam ósim kórsetip otyr. Qurylys salasynda rekordtyq kórsetkishke qol jetkizildi. 900 myń sharshy metrden astam turǵyn úı paıdalanýǵa berildi. Investısıalar kólemi 16 paıyzǵa artsa, ónerkásip óndirisi shamamen 1,9 trln teńgege jetti. Bul – Memleket basshysynyń óńirlerdi damytý jónindegi strategıasynyń naqty nátıjesin aıqyndaıtyn kórsetkish, — dep atap ótti Almaty oblysynyń ákimi Marat Sultanǵazıev.
Kezdesýge aýdannyń túrli salasynda eńbek etetin azamattar — kásipkerler, fermerler, pedagogtar, depýtattar, mádenıet jáne kitaphana qyzmetkerleri, sondaı-aq belsendi turǵyndar qatysty. Ákim men turǵyndar arasyndaǵy dıalog mazmundy ári konstrýktıvti ótti.
Kezdesý barysynda 40-tan astam suraq qoıyldy. Onyń ishinde:
•20%–y joldar men kóshe jaryǵyna qatysty;
•18%–y bilim salasy, úsh aýysymdy mektepter men oqý kabınetteriniń jetispeýshiligi týraly;
•15%-y turǵyn úı-kommýnaldyq sharýashylyǵy;
•10%-y densaýlyq saqtaý jáne sanıtarlyq qaýipsizdik;
•qalǵan 37%-y abattandyrý, qoǵamdyq kólik jáne ekologıa máselelerin qamtydy.
Jergilikti halyq naqty usynystaryn da jetkizdi. Atap aıtqanda, «Sokol» saıajaı alabynda mektep salý, Ótegen batyr aýylynda mýzykalyq mektep ashý, Boraldaı kentinde jańa Mádenıet úıin turǵyzý jáne birqatar aýyldyq okrýgterde dárigerlik ambýlatorıa ashý usynyldy.
Sondaı-aq, Qaraoı aýyldyq okrýginiń turǵyndary sibir jarasy oshaǵy anyqtalǵan jaǵdaı boıynsha sanıtarlyq-epıdemıologıalyq baqylaý sharalary jaıynda túsindirý jumystaryn surady.
Marat Sultanǵazıev árbir kóterilgen máselege jeke toqtalyp, tolyqqandy jaýap berdi.
«Kezdesý qorytyndysy boıynsha naqty merzimi men jaýapty tulǵalary kórsetilgen is-sharalar jospary ázirlenedi. Turǵyndardyń barlyq ótinishteri aýdan men oblys ákimdikteriniń basym baǵytyna engiziledi», — dedi oblys ákimi.
Sondaı-aq ol mundaı kezdesýlerdiń barlyq aýdandarda ótip jatqanyn atap ótti.
«Mundaı kezdesýler halyqtyń ótinish-tilekterine jedel jaýap berýge, olardyń pikirin tikeleı estýge jáne óńirdi damytý josparlaryn naqtylaýǵa múmkindik beredi», — dedi Marat Sultanǵazıev.
Kezdesýden keıin ótken jeke qabyldaýda 12 turǵynnyń ótinishi tyńdaldy. Barlyǵy 24 áleýmettik, ınfraqurylymdyq jáne komýnaldyq sıpattaǵy másele qaraldy.
