Shyǵys Qazaqstan jáne Abaı oblystarynyń 7 aýdanynda 11 áleýmettik nysannyń qurylysyna bólingen 2 mlrd teńgeden astam búdjet qarajatyn jymqyrylǵan, dep habarlaıdy bairaqmedia.kz Qarjylyq monıtorıń agentigine silteme jasap.
Agenttiktiń Shyǵys Qazaqstan oblysy boıynsha departamenti "QazConstructions" JSHS basshylyǵyna qatysty sotqa deıingi tergep-tekserý júrgizip jatyr.
"Kúdiktilerdiń qatarynda – "QazConstructions" JSHS-niń burynǵy dırektorynyń orynbasary, Kúrshim aýdany máslıhatynyń depýtaty bar", - dep jazylǵan habarlamada.
Atalǵan jobalar halyqtyń ómir súrý sapasyn arttyryp, azamattardyń bos ýaqytyn tıimdi ótkizýine jaǵdaı jasaýǵa baǵyttalǵan bolatyn.
Alaıda qylmystyq áreketter saldarynan tórt dene shynyqtyrý-saýyqtyrý kesheni men 20 myńnan astam adam turatyn jeti aýyldy sýmen qamtamasyz etýge arnalǵan sý qubyry jelileri paıdalanýǵa berilmegen.
"Jymqyrylǵan qarjynyń jalpy kólemi 2 mlrd teńgeden asady. Olar baılanysy bar kompanıalar arqyly qolma-qol aqshaǵa aınaldyrylǵan", - deıdi agenttik mamandary.
Qylmystyq jolmen alynǵan tabysqa Astanadaǵy qymbat sanattaǵy turǵyn úı keshenderinen páterler, "Lamborghini Urus", "Cadillac Escalade", "Mercedes" avtokólikteri men asyl tuqymdy jylqylar satyp alynǵan. Bul múlikke sot sanksıasymen tyıym salyndy.
Eki kúdiktige qatysty eki aı merzimge qamaýǵa alý túrindegi bultartpaý sharasy qoldanyldy. Tergeý jalǵasyp jatyr.
