Búgin Túrkistan qalasynyń mektepterinde jańa 2025-2026 oqý jylynyń bastalýyna arnalǵan saltanatty jıyn ótti, dep habarlaıdy bairaqmedia.kz 

Qaladaǵy 85 mektepte alǵashqy qońyraý soǵylyp, 5 500 búldirshin alǵash ret mektep tabaldyryǵyn attady. Jalpy oqý ordalarynda 55 myńnan astam oqýshy bilim almaq. 

Túrkistan qalasynyń ákimi Ázimbek Pazylbekuly arnaıy jaqynda kúrdeli jóndeýden ótken №9 Nekrasov atyndaǵy mekteptiń alǵashqy qońyraý saltanatty sharasyna qatysyp, ustazdar men oqýshylardy aıtýly merekemen quttyqtady.

Memleket basshysy Qasym-Jomart Toqaev dástúrli tamyz konferensıasynda: «Ustaz – ulttyń shamshyraǵy. Eldiń erteńi muǵalimderge tikeleı baılanysty. Sondyqtan ustazdyń qoǵamdaǵy orny bárinen bıik bolýǵa tıis» – dep atap ótkendeı, bilim berý salasynyń damýy el bolashaǵy úshin erekshe mańyzǵa ıe.

Ótken oqý jyly bilim salasy úshin tabysty boldy. 178 túlek «Altyn belgi», 250 oqýshy «Úzdik atestat» ıegeri atandy. Túlekterdiń 80 paıyzdan astamy memlekettik grantqa ıe bolyp, joǵary oqý oryndarynda joǵary bilimin jalǵastyrmaq. Oqýshylar respýblıkalyq jáne halyqaralyq olımpıadalar men túrli baıqaýlarda júldeli oryndarǵa ıe bolyp, qalamyzdyń abyroıyn asqaqtatty. Bıyl odan da joǵary jetistikke jetetinimizge senemin. Jańa oqý jylynda ustazdarǵa qajymas qaırat, shyǵarmashylyq tabys, oqýshylarymyzǵa úzdiksiz izdenis pen bilim shyńyna jetýdi tileımin, - dedi Túrkistan qalasynyń ákimi Ázimbek Pazylbekuly

Aıta keteıik, bıyl jańa oqý jylyna daıyndyq barysynda birqatar bilim nysandarynda jóndeý jumystary júrgizildi. Tórt mektep kúrdeli jóndeýden, jeti mektep aǵymdaǵy jóndeýden ótip, paıdalanýǵa berildi.

Budan bólek, bıyl qosymsha eki jańa nysan – Óner mektebi men Balalar-jasóspirimder ortalyǵy ashylmaq. Bul – balalardyń shyǵarmashylyq qabiletin damytýǵa zor múmkindik beretin mańyzdy qadam. Sondaı-aq, 150 balabaqshada 17 myńnan astam búldirshin tárbıelenip jatyr.