Ózbekstan Syrtqy ister mınıstrligi Reseı tarapynyń mıgranttarǵa qatysty áreketterine baılanysty resmı qarsylyq bildirip, dıplomatıalyq nota joldady, dep jazdy Aniq.uz.

Mınıstrliktiń málimetinshe, Reseı aýmaǵynda keı jaǵdaılarda Ózbekstan azamattaryna ruqsatsyz tekserýler júrgizilip, dóreki jáne qurmetsiz qarym-qatynas jasalǵan. Mundaı áreketter eki el arasyndaǵy dostyq qatynastarǵa qaıshy keletini atap ótilip, olardyń aldyn alý úshin naqty sharalar qabyldaý qajettigi kórsetildi.

Ózbekstan SİM barlyq azamattardyń ar-namysy men qadir-qasıeti qorǵalýy tıis ekenin, sondaı-aq adam quqyqtary men halyqaralyq quqyq normalarynyń saqtalýy qajet ekenin qatań málimdedi.

Máskeýdegi Ózbekstan elshiligi Reseı Syrtqy ister mınıstrligine joldaǵan notada mynadaı máseleler kórsetildi:

— Reseı aýmaǵyndaǵy keıbir quqyq qorǵaý organdary ókilderi tarapynan kúsh qoldaný jaǵdaılary;
— mundaı áreketterdiń adam quqyqtarynyń óreskel buzylýy ekendigi;
— oryn alǵan oqıǵalarǵa quqyqtyq baǵa berý qajettigi.

Ózbekstan Respýblıkasynyń Syrtqy ister mınıstrligi bul máseleni turaqty baqylaýda ustaıtynyn jáne qajet bolǵan jaǵdaıda qosymsha sharalar qabyldaıtynyn jetkizdi.

Aıta keteıik, buǵan deıin áleýmettik jeliler men BAQ-ta Reseıde taksıst bop jumys istep júrgen Ózbekstan azamatyna jergilikti turǵyndardyń biri aýzyna kelgenin aıtyp, «sender — orystardyń qulysyńdar» degenin kórsetetin aqparat pen beınejazba taraǵan bolatyn.