Jetisý oblysy Jarkent qalasynda 4 jasar balasyn aıaýsyz soqqyǵa jyqqan áıelge qatysty oqıǵaǵa baılanysty onyń kúıeýi jaǵdaıdyń qalaı bolǵanyn stan.kz tilshisine aıtyp berdi, dep habarlaıdy bairaqmedia.kz.

Buǵan deıin áleýmettik jelide 5 jasar balany jylý batareıasyna baılap qoıyp, aıaýsyz soqqyǵa jyqqan ananyń vıdeosy taraǵan bolatyn. Balalardyń ákesiniń aıtýynsha, beınejazbany otbasymen birge turatyn tanysy túsirgen. Anasy úlken uly kishi dáretke jiberip qoıǵandyqtan, betinen tepkilep, balany aıaýsyz jazalaǵan.

“Úıde synyptas qyz bar, vıdeoǵa sol túsirgen. Men dúkennen kelgennen keıin maǵan ońashada vıdeony kórsetti. Men vıdeony kórdim, biraq áıelimnen ne úshin urdyń dep suraǵan joqpyn. Sosyn men vıdeony jan-jaqqa jibere bastadym”, – deıdi balalardyń ákesi Taır Kýrvanshanov.

Taır Kýrvanshanov pen áıeli Marıanyń ortaq eki balasy bar. Er adamnyń aıtýynsha, áıeldiń psıhologıalyq dıagnozy bar jáne mundaı jaǵdaı buǵan deıin birneshe ret qaıtalanǵan.

“Jaqynda bastady. Eki-úsh aı boldy. Buǵan deıin barlyǵy jaqsy bolǵan, balalardy urmaıtyn. Anda-sanda betterinen shapalaq uryp qoıady. Balaǵattap jiberedi. Keıde suraımyn, balalardyń qolyna ne bolǵan dep, balalar bir-birimen tóbelesti deıdi. Sosyn bireýiniń beti kógerdi, taǵy ne boldy dep suradym, taǵy bir-birimen soǵysyp qaldy deıdi. Mán bermeıtinmin, jumystamyn ǵoı. Biraq, eki balanyń bir-biriniń betin kógertýi múmkin emes qoı. Psıhologıalyq, úshinshi toptaǵy múgediktegi bar”, – deıdi balalardyń ákesi.

Er adam kelinsheginiń sońǵy eki aıda kúrt ózgerip, kózine shóp salǵan soń, 15 kún buryn ajyrasýǵa ótinish tastaǵanyn aıtady.

“Zańdy nekedemiz. 10-15 kún buryn ajyrasýǵa ótinish tastadym. Ana quqyǵynan aıyrylsyn, eki bala mende qalsyn, men ákesimin ǵoı”, – deıdi er adam.

Vıdeo jelige taraǵannan keıin polısıa tekseris júrgizip, 28 jastaǵy áıeldiń balaǵa dene jaraqatyn salǵanyn anyqtaǵan. Osyǵan baılanysty qylmystyq is qozǵalyp, áıel polısıa bólimshesine jetkizilgen.

Balasyna qatigezdik tanytqan áıel 28 jasta, kúıeýi 30 jasta. Ekeýi de Jarkent qalasyndaǵy №4 arnaıy mektep-ınternatynda tárbıelengen. Áıel ata-anasynan jetim bolsa, kúıeýi ata-ana qamqorlyǵynsyz qalǵan.

“Erli-zaıyptyda jeńil aqyl-oı kemistigi, jeńil zerde buzylysy dıagnozy bolǵan. Psıhonevrologıalyq dıspanserlik esepte turady. Bul otbasyny polısıa qyzmetkeri 18 qańtar kúni túngi saǵat 23:30 shamasynda Otbasyn qoldaý ortalyǵyna jetkizdi. Balalar medısınalyq tekserýden ótkizildi. Anasy polısıa bólimshesinde qaldy”, – deıdi qalalyq ákimdiktegiler.

Balalardyń biri 4 jasta, ekinshisi 2 jasta. Qazirgi tańda olar Jarkent qalasyndaǵy otbasyny qoldaý ortalyǵyna ornalastyrylǵan.