Nuraı Serikbaıdyń ólimine baılanysty júrgizilgen qyzmettik tekserý qorytyndysy boıynsha Shymkent qalalyq polısıa departamentiniń basshysy qyzmetinen bosatyldy. Bul týraly Qazaqstan Respýblıkasynyń İshki ister mınıstrligi málimdedi.

Mınıstrliktiń dereginshe, 11 qańtarda Shymkent turǵyny Nuraı Serikbaı alǵan kóp pyshaq jaraqatynan qaıtys bolǵan. Qaıǵyly oqıǵaǵa deıin kúdiktiniń marqumdy qorqytyp, ańdyp júrgeni belgili bolǵan. Alaıda qyzdyń ata-anasy polısıaǵa júgingenimen, qylmystyq is ýaqytynda tirkelmegen.

16 qańtarda İİM Shymkent qalalyq polısıa departamentinde qyzmettik tekserý bastalǵanyn habarlaǵan. Buǵan qosa, Memleket basshysy Qasym-Jomart Toqaev quqyq qorǵaý organdarynyń áreketterin tekserýdi tapsyrǵan.

Qyzmettik tergeý nátıjesinde tártiptik sheshimder qabyldandy. Qoǵamdyq tártipti qamtamasyz etýge salǵyrt qaraǵany úshin departament basshysy men onyń birinshi orynbasary laýazymdarynan bosatyldy. Sondaı-aq birqatar qyzmetker ishki ister organdarynan shyǵaryldy.

İİM zań talaptarynyń buzylýyna, sondaı-aq zorlyq-zombylyq pen qatygezdikke jol bergen kez kelgen jaǵdaıǵa qatysty ustanymynyń qatań ekenin atap ótti.

Resmı málimetke sáıkes, Shymkent qalalyq polısıa departamentin Nurlan Almasbekov basqarǵan, al onyń birinshi orynbasary qyzmetin Qurmanbek Sahov atqarǵan.

Sonymen birge İİM-niń Ózindik qaýipsizdik departamenti marqumnyń týystarynyń aryzyna tıisinshe quqyqtyq baǵa berilmeýi múmkin degen derek boıynsha sotqa deıingi tergep-tekserý jumystaryn júrgizip jatyr.