Memleket basshysy Qasym-Jomart Toqaevtyń V Ulttyq quryltaı otyrysynda: «Eldegi avtokólik joldaryn halyqaralyq standarttarǵa saı jańǵyrtý – aıryqsha mańyzdy mindet» dep atap ótýin jolshylar qaýymy úlken jaýapkershilikpen qabyldady, dep habarlaıdy bairaqmedia.kz

Buǵan qatysty tehnıka ǵylymdarynyń kandıdaty, «qurmetti jolshy»
Qalıjan Qulmanov pikir bildirdi. 

Bul rette jol qurylysynyń ózimen qatar, jol sapasyn qadaǵalaý men onyń belgilengen standarttarǵa saı bolýyn qamtamasyz etý de asa mańyzdy. Atalǵan baǵyttaǵy júıeli baqylaý men saraptamany Jol aktıvteri sapasynyń ulttyq ortalyǵy júzege asyryp keledi.
Sebebi avtomobıl joly – eldiń kúre tamyry, ıaǵnı ekonomıkamyzdyń basty qozǵaýshy kúshteriniń biri. Keńes kezeńinde elimizdiń shıkizatyn ortalyqqa tasymaldaýǵa negizdelgen saıasattyń saldarynan Qazaqstandaǵy negizgi kúre joldardyń basym bóligi ońtústikten soltústikke qaraı baǵyttalǵany belgili.
Sońǵy jyldardaǵy iri ınfraqurylymdyq jobalardyń biri – «Batys Qytaı – Batys Eýropa» halyqaralyq kólik dálizi. Alaıda osy joldyń Qyzylorda – Aqtóbe aralyǵyndaǵy bóliginde kólik qozǵalysynyń kúrt artýyna baılanysty jol qaýipsizdigi men sapasyna qoıylatyn talaptar tolyq saqtalmaı otyr. Mundaı jaǵdaıda joldyń tehnıkalyq jaı-kúıin turaqty baqylaýda ustap, sapasyna erekshe mán berý – ýaqyt talaby, - dedi Qalıjan Qulmanov.

Ol zaıyrly memleket retindegi basty qaǵıdalarymyzdyń biri – azamattardyń ómiri men qaýipsizdigin saqtaý dep atap ótti.

Osy turǵydan alǵanda, Memleket basshysynyń atalǵan joldy keńeıtý jónindegi tapsyrmasy kezek kúttirmeıtin mańyzdy másele ekenin aıqyn kórsetedi. Atalǵan kúre joldyń bir tarmaǵy sanalatyn Qyzylorda – Jezqazǵan avtojoly da Memleket basshysynyń nazarynda turǵan strategıalyq mańyzy bar baǵyttardyń biri. Bul jol toraby kórshiles Ózbekstan, Qyrǵyzstan jáne Tájikstannan keletin jemis-jıdek pen kókónis ónimderin elimizdiń Soltústik jáne Shyǵys óńirlerine jyldam, sapaly ári qoljetimdi baǵamen jetkizýdiń tıimdi joly bolmaq. Jol tolyq paıdalanýǵa berilgen soń bul baǵyttaǵy kólik qarqyndylyǵy birneshe ese artady, sondyqtan onyń sapasy men qaýipsizdigine búginnen bastap júıeli baqylaý qajet, - dedi ol.

Sondaı-aq, «Ortalyq pen Batysty» baılanystyratyn jol máselesi de ózekti.

Qasym-Jomart Kemelulynyń 2025 jylǵy Joldaýynda «Beıneý – Sekseýil» avtojolynyń qurylysyn jedeldetý jóninde naqty tapsyrma bergeni barshamyzdyń esimizde.
Osy ýaqytqa deıin elimizdiń Soltústigi men Batysyn tikeleı baılanystyratyn kúre joldyń bolmaýy – úlken olqylyq edi. Atalǵan jobanyń iske asýy jer baılyǵy men el baılyǵyn Mańǵystaý oblysyndaǵy Quryq porty arqyly Kaspıı teńizine shyǵaryp, ekonomıkalyq áleýetimizdi arttyrýǵa múmkindik beredi. Halyq tyǵyz ornalasqan Túrkistan oblysyndaǵy joldardy qaıta jańǵyrtý máselesi de erekshe nazardy talap etedi. Bul óńirde jol sapasyn arttyrý tek ınjenerlik emes, ǵylymı negizdelgen keshendi sheshimderdi qajet etedi, - dep qorytyndylady Qalıjan Qulmanov.