Din degenimiz osy eken dep, kósemderiniń sózine ılanǵan jastardyń aq pen qarasyn ajyratyp jatpastan, soqyr senimmen adasýlarynyń bir ushy osy bilimsizdikte jatyr. Túrkistan oblysy Din isteri basqarmasyna qarasty "Din máselelerin zertteý ortalyǵynyń" teolog mamany İlıas Naǵyzhan osylaı málimdedi, - dep habarlaıdy bairaqmedia.kz
Onyń aıtýynsha, qazirgi zamandaǵy adamdardyń eń álsiz tusy - bilimsizdik pen ǵylym úırenýge degen qulshynystyń joqtyǵy.
«Óziń bilme, bilgenniń tilin alma»,- degen sózdi qazaq halqy qarǵystyń eń aýyry dep te jatady. Sol bir saýatsyzdyqtyń arqasynda qazirgi tańda ǵalamtor jelisi arqyly da, ózderiniń túısigi qataımaǵan jasóspirimderdi jat aǵymnyń jolyna ońaı burmalap alýda. Jalpy dinı ekstermızmniń elimizdiń qaı aımaǵynda bolmasyn taralýyna sebep bolatyn birneshe alǵysharttaryn atap ótýge bolady. Solardyń ishinde eń aldymen bul - dinı saýatsyzdyq. Dinge tolyq tanymmen kelmeý dinı saýatsyzdyqtyń basty kórinisi bolyp otyr, - dedi İlıas Naǵyzhan.
Turǵyndardyń arasynda, ásirese jastardyń ózgelerge elikteýi, belgili bir toptyń múshesi bolýǵa degen yntasy soqyr senimge negizdelgen dinshildikke alyp keledi. Mundaı soqyr senim dinı fýndamentalızmniń, sáıkesinshe dinı fanatızmniń alǵysharttaryna aınalady dep atap ótti teolog.
Fýndamentalısttik kóńil-kúı ekstremızmge aparar jol, óıtkeni ekstremısttik paıymda óziniń ǵana dinı ustanymy eń shynaıy, aqıqat ári taza dep uǵynylady. Sáıkesinshe, ózge din ókilderine tózimsizdik, qysym kórsetý sekildi kóńil-kúı týyndaıdy. Mundaı ustanym óz senimin, kózqarasyn meılinshe keń taratý, qajet bolsa kúshtep tańý áreketine saıady. Osy jaǵdaıda, dinı motıvtegi terorızm kórinisi men onyń ókinishiti saldary oryn alady. Alaıda, dinı ekstremızmmen kúreste eń mańyzdy qadam bul dinı saýattylyq ekendigi daýsyz. Dinı saýatty bolý úshin belgili-bir dinı kýrsty bitirý shart emes, - dep atap ótti İlıas Naǵyzhan.
Mamannyń aıtýynsha, dinı saýattylyq ulttyq tarıh, dástúrmen qatar, álemdik deńgeıdegi úrdisterden habardar bolýdan quralady. Óz Otanyn súıý men dástúrin ustaný, tarıhyn qasterleý dinı saýattylyqtyń bir qyry deıdi teolog. Aıtýynsha, tarıhymyzǵa úńilgen kez-kelgen adam qazaq halqynda ózge eldi jaýlaý, ózge ult pen dindi kemsitý sekildi kórinisterdiń oryn almaǵandyǵyn kóredi. Sondaı-aq, ulttyq dástúrdiń ıslam sharttaryna qarsy kelmeıtindigin, tipti úndesip turatyndyǵyn baıqaý úshin de asqan saýattylyqtyń qajeti joq dep atap ótti.
