Shymkentte 9-synyp oqýshysy óz úıiniń saraıynda asylyp qaldy. Jaqyndarynyń aıtýynsha, qaıǵyly jaǵdaıdyń sebebi — býllıng, dep habarlaıdy bairaqmedia.kz Almaty.tv-ǵa silteme jasap.

Marqum telefonynda tórt synyptasyna arnap jazba qaldyrǵan. Onda: «Endi sender meni ura almaısyńdar», — dep jazylǵan.

«Ákesiniń qaıtys bolǵanyna úsh jyl boldy. Mektepte ony osy úshin mazaq etti. Bir bala aqsha, temeki ákelýge májbúrlep, aıtqanyn istetetin», — deıdi qaza tapqan balanyń anasy Janerke Júnisbekova.

Ómirseriktiń sońǵy jazbasynda kórsetilgen tórt esim — synyptastarynyń aty. Olardyń biri polısıa esebinde tur. Qaıǵyly jaǵdaı boıynsha qylmystyq is qozǵaldy.

Ata-anasy kinálilerdi, sondaı-aq mektep ákimshiligin jaýapqa tartýdy talap etýde. Qaıtys bolǵan bala qaladaǵy №32 mektepte oqyǵan. Onyń osy mektepti bitirgen ápkesi de kezinde qysym men aqsha bopsalaýǵa kýá bolǵanyn aıtty.

Al mektep ákimshiligi oqýshylar arasynda aqsha jınaý men janjaldyń bolǵanyn joqqa shyǵardy.

«Ókinishke qaraı, biz bolǵan jaǵdaıdy kesh bildik. Oqıǵa aldynda eshqandaı tóbeles bolmady. Ony eshkim urǵan joq», — dedi mekteptiń tárbıe isi jónindegi orynbasary Raıhan Týleeva.