Memleket basshysy munaı-gaz salasynyń qyzmetkerlerin kásibı merekesimen quttyqtady, dep habarlady Aqorda.

Aqordada ótken saltanatty jıynda Qasym-Jomart Toqaev munaı-gaz kesheni el ekonomıkasynyń asa mańyzdy salasy ekenin aıtty.

"Jalpy, elimizdegi munaı-gaz ónerkásibiniń ózindik dástúri, baı tarıhy bar. Osy salanyń qalyptasyp, órkendeýine birneshe býyn ókilderi zor eńbek sińirdi. Sizderdi aǵa býynnyń laıyqty izbasary deýge bolady. Qazir munaı-gaz salasynda eki júz myńnan astam adam jumys isteıdi. Sizderdiń tabandy eńbekterińizdiń arqasynda Qazaqstanymyz órkendep, kórkeıip jatyr. Men muny joǵary baǵalaımyn. Bárińizge shynaıy rızashylyǵymdy bildiremin", – dedi Qasym-Jomart Toqaev.

Prezıdent byltyr qazaq munaıynyń 125 jyldyǵy atalǵanyn eske salyp, bıyl da osy sala úshin aıtýly jyl ekenine toqtaldy.

Sonymen qatar, Qasym-Jomart Toqaev Qazaqstan shıkizat óndirýmen qatar, ony tereń óńdeýge basa mán beretinin aıtty.

Ol Atyraý, Pavlodar, Shymkent qalalarynda ornalasqan úsh iri munaı óńdeý zaýyty jańǵyrtylǵanyn, júıeli jumystyń nátıjesinde 13 mıllıonǵa jýyq adam tabıǵı gazǵa qol jetkizgenin málimdedi.