Almaty oblysynda 2025 jyly turǵyn úı qurylysy men satyp alýǵa baǵyttalǵan aýqymdy baǵdarlama júzege asyrylýda, - dep habarlaıdy bairaqmedia.kz

Búdjet qarajaty esebinen jalpy aýmaǵy 118,0 myń sharshy metrdi quraıtyn 1522 páterlik 28 úıdiń qurylysy aıaqtalyp, paıdalanýǵa berilmek. Birqatar úıler qazirdiń ózinde tapsyryldy, al problemalyq nysandar boıynsha tıisti sharalar qabyldanýda.

Talǵar men Jambyl aýdanynda keıbir páterlerge turǵyndar qonystanyp úlgerdi, birneshe nysan aıaqtalý satysynda. Oblys ákimdiginiń málimetinshe, barlyq máseleler baqylaýda, merzimdi buzǵan merdigerlerge qatysty zań aıasynda jumys júrgizilýde.

Sonymen qatar daıyn turǵyn úıdi satyp alý da qatar júrgizilip jatyr. Bıyl áleýmettik osal toptar men kezekte turǵandar úshin 1700 páter satyp alýǵa 27,4 mlrd teńge qarastyrylǵan. Onyń ishinde 200-den astam otbasy jańa páterdiń kiltin alyp úlgerdi, qalǵandary kezeń-kezeńimen qamtamasyz etiledi.

Almaty oblysy ákiminiń orynbasary Aset Masabaev aımaqta azamattar aldyndaǵy mindettemelerdi tolyq oryndaý kózdelgenin atap ótti.

Kezekte turǵan árbir otbasy óz baspanasyn ýaqytynda alýy mańyzdy. Problemalyq nysandar boıynsha baqylaýdy kúsheıttik, adal emes merdigerlerge shara qoldanylyp jatyr. Sonymen qatar daıyn turǵyn úıdi satyp alý jumystary júrgizilýde, halyqty kútýge qaldyrmaý úshin, — dedi ol.

Jyl sońyna deıin Qonaev, Talǵar jáne Esik qalalarynda iri nysandardyń qurylysy aıaqtalady dep josparlanýda. Qurylystyń daıyndyq deńgeıi 90%-dan asqan, úılerdi belgilengen merzimde paıdalanýǵa berý kózdelip otyr.