AQSH Prezıdenti Donald Tramp Memleket basshysy Qasym-Jomart Toqaevty Gaza boıynsha qurylatyn Beıbitshilik keńesiniń quramyna kirýge resmı shaqyryp, al Qazaqstanǵa quryltaıshy memleketterdiń biri bolýdy usyndy. Bul jaıynda Tengrinews.kz portalyna Prezıdenttiń kómekshisi – Baspasóz hatshysy Rýslan Jeldibaı aıtty.
Buǵan deıin málim bolǵanyndaı, AQSH Prezıdenti Gaza boıynsha Beıbitshilik keńesin qurady. Atalǵan keńeske quryltaıshy memleket retinde qatysýǵa birqatar eldiń basshylaryna shaqyrý joldanǵan. Argentına, Majarstan, Túrkıa, Pákistan, Mysyr, Iordanıa, Qatar jáne Italıa mundaı shaqyrtý alǵandaryn rastap, ony qabyldaǵandaryn jarıa etti.
Sonymen qatar shaqyrý Fransıa, Germanıa jáne BAÁ kóshbasshylaryna da joldanǵan. Alaıda, ázirshe olardyń tarabynan resmı rastaý bolǵan joq.
Osynyń aıasynda dıplomatıalyq ortada jáne jýrnalıser arasynda elimizdiń álemdegi turaqtylyq pen qaýipsizdikti nyǵaıtýdaǵy úlesin, onyń ishinde Gaza sektory men jalpy Taıaý shyǵystaǵy ahýaldy retteýdegi kúsh-jigerin moıyndaý retinde dál osyndaı shaqyrtýdy Prezıdent Qasym-Jomart Toqaevtyń da alǵany talqylana bastady.
Vashıngton Prezıdent Qasym-Jomart Toqaevtyń Ibrahım kelisimine qosylý týraly sheshimin de joǵary baǵalaǵandyǵy da erekshe atap ótiledi.
Munan bólek, Memleket basshymyz taıaýda Donald Tramppen, Mahmýd Abbaspen jáne Bınámın Netanáhýmen telefon arqyly kelissóz júrgizdi. Osyǵan oraı Tengrinews.kz Aqordaǵa Aq úıden Beıbitshilik keńesine qatysý týraly resmı shaqyrý bolǵan-bolmaǵanyn anyqtap kórýge tyrysqan edi.
Prezıdenttiń baspasóz hatshysy Rýslan Jeldibaı bul faktini rastady.
- Birqatar eldiń kóshbasshylarynyń Prezıdent Donald Tramptan mundaı resmı shaqyrý alǵany týraly málimdemelerinen keıin bul faktini jasyrý durys bolmas edi. Iá, Prezıdent Qasym-Jomart Toqaev álem kóshbasshyldarynyń arasynda alǵashqylardyń biri bolyp Beıtishlik keńesiniń quramyna kirý, al Qazaqstanǵa quryltaıshylardyń bir bolý týraly resmı shaqyrý aldy. Memleket basshysy AQSH Prezıdentiniń atyna jaýap hat joldap, shynaıy rızashylyǵyn bildirdi jáne atalǵan jańa birlestiktiń quramyna kirýge kelisetinin jetkizdi. Prezıdent Qazaqstannyń Taıaý Shyǵysta myǵym beıbitshilikke qol jetkizýge jan-jaqty úles qosýǵa, memleketaralyq senim men jahandyq turaqtylyqty nyǵaıtýǵa umtylatynyn rastady, - dedi ol.
Sonymen qatar ol Prezıdenttiń jáne onyń baspasóz qyzmetiniń bul máseleni osy ýaqytqa deıin nelikten jarıalamaǵanyn túsindirdi.
- Biz Donald Tramp ákimshiligi resmı habarlaǵanǵa deıin bul máselege qatysty málimdeme jasaý ádepsiz bolady dep sanadyq. Degenmen, proses ózdiginen júrip ketti. Kelisim alynǵannan keıin Beıbitshilik keńesiniń quramyna kirýge kelisken memleketterdiń tolyq tizimi jarıa etilip qalar, - dep túsindiredi Rýslan Jeldibaı.
