Áleýmettik jelilerde kútpegen jerden AQSH prezıdenti Donald Tramptyń qaıtys bolǵany týraly habar tarap, búkil ınternetti shýlatty. #TrumpIsDead heshtegi X (Twitter) jelisinde birden trendke shyǵyp, ondaǵan myń adam osy taqyrypta jazba jarıalady, dep jazady Ozgeris.info. 

Alaıda bul málimet shyndyqqa janaspady. Aq úı ókilderi dereý túsinikteme berip, Tramptyń jaǵdaıy jaqsy ekenin aıtty. Amerıkalyq jýrnalıs Barak Ravıdke bergen suhbatynda aty-jónin atamaǵan qyzmetker:

«Prezıdenttiń jaǵdaıy jaqsy. Ol búgin tańerteń gólf oınap júr»,  dedi.

AQSH baspasóziniń jazýynsha, memleket basshysy tańerteń kortejben shyǵyp, aq polo jeıde men qyzyl beısbolka kıip júrgeni baıqalǵan. Biraq bul sáttiń sýretterin Aq úı resmı túrde jarıalaǵan joq.

Qaýeset qalaı shyqty? Sarapshylardyń pikirinshe, bul áńgimeler Tramptyń densaýlyǵyna qatysty burynnan kele jatqan alypqashpa sózdermen, orynbasary Djeı Dı Venstiń sońǵy málimdemelerimen jáne «Sımpsondar» mýltserıalyna qatysty ınternettegi ázildermen toǵysyp ketken. Sonyń saldarynan jelide jalǵan aqparat vırýstyq trendke aınaldy.

Aqıqat qandaı? Shyndyǵynda, Tramp tiri jáne ádettegideı óziniń súıikti isi – gólfpen aınalysyp júr. Iaǵnı áleýmettik jelilerdegi «qaıǵyly habardyń» eshqandaı resmı negizi joq.

Bul jaǵdaı taǵy bir márte ınternet qaýesetteriniń qanshalyqty jyldam taraıtynyn jáne qoǵamdy dúrliktire alatynyn kórsetti.