Memleket basshysy «Qazaqstan Respýblıkasynyń keıbir zańnamalyq aktilerine taýarlardyń shyǵarylǵan elin aıqyndaý máseleleri boıynsha ózgerister men tolyqtyrýlar engizý týraly» Zańǵa qol qoıdy, dep habarlaıdy Bairaqmedia.kz.

Túzetýlerdiń birinshi blogynda Qazaqstan taýar óndirýshiler tizilimi (budan ári – Tizilim) engizildi. «Elektrondyq úkimettiń» aqparattyq-kommýnıkasıalyq ınfraqurylym nysany retinde jumys isteıtin tizilimde otandyq taýar óndirýshiler men olar óndiretin taýarlar týraly málimetter qamtylady. Tizilimge engizilgen taýar óndirýshilerge memlekettik qoldaý sharalary qoljetimdi bolady. Sondaı-aq olar memleket satyp alýlar men kvazımemlekettik sektor sýbektileriniń satyp alýlaryna qatysa alady.

Tizilimniń qoldanysqa enýine baılanysty buryn taýardyń shyǵý tegin rastaý úshin paıdalanylǵan ST-KZ jáne ındýstrıalyq sertıfıkattaryn, sondaı-aq saraptama aktisin berý kezinde tártipti buzǵany úshin belgilenetin ákimshilik jaýapkershilik zańnamadan alynyp tastaldy.

Túzetýlerdiń ekinshi blogy elishilik qundylyqtar ınstıtýtyn odan ári jetildirýge baǵyttalǵan. Osy maqsatta Úkimet bekitetin qaǵıdalarǵa sáıkes, iri tapsyrys berýshilerge el ishindegi qundylyqtardy damytý baǵdarlamalaryn bekitý jáne iske asyrý mindeti júkteledi.

Ónerkásipti damytý úshin kelisimsharttyńjańa túri – kepildendirilgen satyp alý kelisimsharty engizildi. Bul shartqa sáıkes óńdeýshi kásiporyn óziniń óndiris alańynda óndirilgen taýarlardyń kepildi kólemin uzaq merzimdi negizde jetkizip berýge mindettenedi.

Túzetýlerdiń úshinshi blogy kodtar men ataýlardy júıeleý arqyly taýarlardy, jumystar men kórsetiletin qyzmetterdi jikteýdiń biryńǵaı júıesin qamtamasyz etetin Taýarlardyń, jumystardyń jáne kórsetiletin qyzmetterdiń jalpy synyptaýyshyn engizýdi jáne júrgizýdi kózdeıdi.

TJKQJS-ny engizýdiń negizgi oń áserleri mynadaı: barlyq jikteýish birizdendireledi; búkil saladaǵy taýarlar men qyzmetterdiń túrleri, sıpattamalary barynsha naqtylanady; taýar aınalymyn qadaǵalaýǵa múmkindik týady; biryńǵaı nomenklatýra túziledi; taýarlardyń qadaǵalanýyn durys jikteýge jáne túpkilikti sáıkestendirýge; kóleńkeli ekonomıkany meılinshe azaıtýǵa múmkindik paıda bolady.