Memleket basshysy Halyqaralyq shańǵy sporty jáne snoýbord federasıasynyń (FIS) prezıdenti Iohan Elıashty qabyldady, dep habarlaıdy Aqorda.

Kezdesýde Qazaqstannyń Halyqaralyq shańǵy sporty federasıasymen yntymaqtastyq perspektıvasy talqylandy. 

Qasym-Jomart Toqaev elimizde 85 myńnan asa adam shańǵy sportymen turaqty túrde shuǵyldanatynyn atap ótti. Sondaı-aq Qazaqstanda taý shańǵysy men shańǵy jarysy keshenderi, halyqaralyq deńgeıdegi muz arenalary sekildi zamanaýı ınfraqurylymdar bar. 

Memleket basshysy elimiz jaqynda Italıada ótetin Qysqy Olımpıada oıyndaryna tyńǵylyqty daıyndalyp jatqanyn jetkizdi.

FIS prezıdenti sportqa qoldaý kórsetkeni úshin Memleket basshysyna alǵys aıtyp, qazaqstandyqtar álemniń baıraqty básekelerinde laıyqty óner kórsetip júrgenine nazar aýdardy. 

Sondaı-aq ol Qazaqstanda júzege asyrylyp jatqan áleýmettik-ekonomıkalyq reformalarǵa joǵary baǵa berdi.

Qasym-Jomart Toqaev pen Iohan Elıash elimizdiń Halyqaralyq shańǵy sporty federasıasymen tájirıbe almasý, sportshylardy daıarlaý, bapkerlerdi oqytý jáne tórelik etý baǵyttaryndaǵy yqpaldastyqty keńeıtý múmkindikterin qarastyrdy.