Memleket basshysy Qasym-Jomart Toqaev Almatyda Italıa saýda úıin ashýdy usyndy. Bul týraly ol Astanada ótken birinshi «Ortalyq Azıa – Italıa» samıtinde aıtty, dep habarlaıdy Bairaqmedia.kz.
Samıtti ashqan Qasym-Jomart Toqaev Qazaqstanǵa saparmen kelgeni jáne búgingi joǵary deńgeıdegi kezdesýge bastamashy bolǵany úshin Italıa Mınıstrler keńesiniń tóraǵasy Djordja Melonıge rızashylyǵyn bildirdi.
Qasym-Jomart Toqaev Italıamen yqpaldastyqtyń perspektıvti baǵyttaryna qatysty oıymen bólisti.
Saýda-ekonomıkalyq baılanysty tereńdetý – basty basymdyq. Álemniń negizgi ekonomıkalyq polústeri arasyndaǵy tarıftik qaqtyǵystyń saldary barlyq el úshin aýyr bolýy múmkin. Mundaı jaǵdaıda buryn jolǵa qoıylǵan saýda-ekonomıkalyq baılanystardy saqtap qalýmen birge, ony nyǵaıtýǵa kúsh salý da óte mańyzdy. Bizdiń oıymyzsha, birlesken jobalardy iske qosýǵa, eń aldymen, qosylǵan quny joǵary ónim shyǵarý esebinen taýarlardyń túrin kóbeıtýge basa mán berýge bolady. Máselen, Qazaqstan Italıaǵa jalpy quny 1 mıllıard dollarǵa jýyqtaıtyn taýardyń 100-den asa túri boıynsha eksport kólemin arttyrýǵa daıyn. Bul rette metalýrgıa, mashına jasaý, munaı-hımıa ónerkásibi jáne basqa da ónimder týraly sóz bolyp otyr, – dedi prezıdent.
Qasym-Jomart Toqaev Ortalyq Azıa elderi Eýropaǵa ózderiniń agroónerkásip ónimderin jetkizýde mol áleýetke ıe dep sanaıdy. Budan bólek, saýda úıleri men logıstıkalyq ortalyqtardyń ashylýy elder arasyndaǵy saýda-sattyqqa tyń serpin beredi. Osy oraıda, Qazaqstan prezıdenti Almatyda Italıa saýda úıin ashýdy usyndy.
Qasym-Jomart Toqaev Qazaqstan-Italıa seriktestiginiń lokomotıvi sanalatyn energetıka salasyndaǵy yntymaqtastyqty taǵy bir ózekti mindet retinde atady.
Elimiz Eýropa Odaǵyna munaı eksporttaýshy memleketterdiń alǵashqy úshtigine kiredi. Byltyr Qazaqstannan Italıa naryǵyna jetken munaı kólemi 30 mıllıon tonnadan asty. Bul 2023 jylǵy kórsetkishten 27 paıyzǵa artyq. Qajet bolǵan jaǵdaıda onyń kólemin arttyrýǵa daıynbyz. Sonymen qatar bolashaǵymyz balamaly energıa kózderine baılanysty bolmaq. Bul qazirdiń ózinde anyq baıqalady. Tómen kómirtekti ekonomıkaǵa júıeli túrde kóshý – Qazaqstan basymdyqtarynyń biri. Italıalyq seriktesterimizben birlesip, elimizdiń birqatar óńirinde jel men kún elektr stansıalaryn salyp jatyrmyz. Atalǵan jobalar úshin rızashylyǵymyzdy bildiremiz, – dedi prezıdent.
