Sý basý qaýpin azaıtý jáne halyqtyń qaýipsizdigin qamtamasyz etý maqsatynda sý tasqyny qaýpi bar ýchaskelerde sý tasqynyna qarsy is-sharalar jalǵasyp jatyr. Bul is-sharalarǵa azamattyq qorǵaý qyzmetteri jumyldyryldy, dep habarlaıdy Bairaqmedia.kz.
TJM aqparatyna sáıkes, bıylǵy 1 naýryzdan bastap 5,4 mıllıonnan astam tekshe metr sý sorylyp, 855 myń qapshyq jáne 44 myń tonna ınertti materıaldar tóselgen. Sonymen qatar 843 myńnan astam metr sý burý aryqtaryn tazartý jumystary júrgizildi. Sý tasqyny kezeńinde 638 adam, onyń ishinde 139 bala evakýasıalandy. 380 adam, onyń 101 bala úılerine oraldy. 252 adam, onyń ishinde 38 bala ýaqytsha ornalastyrý pýnkteri men týystarynyń úılerinde.
Soltústik Qazaqstan oblysyndaǵy avtomobıl joldarynyń 3 ýchaskesinde tasyǵan sý baqylaýda. 1 eldi meken kólik qatynasynsyz qalýda, bul Soltústik Qazaqstan oblysynyń Prıbrejnoe aýyly, onda turǵyndar úshin ótkel qamtamasyz etilgen.
Qazir eki óńir baqylaýda: Soltústik Qazaqstan, Shyǵys Qazaqstan oblystary.
Soltústik Qazaqstan oblysynda Qyzyljar aýdanynyń Teplıchnoe, Prıbrejnoe, Olshanka, Vagýlıno, Sokolovka, Bolshaıa Malyshka aýyldary men Petropavl qalasynyń Zarechnyı kentinde turǵyn úılerdi sý basý qaýpin boldyrmaý maqsatynda táýlik boıy qorǵanysh qurylystaryn salý jáne nyǵaıtý úshin qapshyqtardy daıyndaý jáne tóseý jumystary júrgizilýde. Petropavl qalasynyń Prıbrejnoe aýyly men Zarechnyı kentinde halyqty júzý quraldarynyń kómegimen tasymaldaý júzege asyrylýda. Oblys aýmaǵynda sý tasqynyna qarsy is-sharalarǵa TJM, İİM, UU, Qorǵanysmıni, JAO kúshteri men quraldary jeke quramynan 2020 adam, 159 birlik tehnıka, 38 motopompa jáne 25 júzý quraly jumyldyryldy. Sonymen qatar Astana q., Aqmola, Qostanaı oblystarynan, TJM 52859 áskerı bóliminen, Azamattyq qorǵaý akademıasynan qosymsha kúshter men quraldar tartyldy.
Bolshaıa Malyshka aýylynda Esil ózeninde sý deńgeıiniń kóterilýi saldarynan qorǵanysh-jer biligi jyryldy. Atalǵan eldi mekende 254 úı bar, onda 666 adam turady, turǵyn úılerdi sý basqan joq. Jer úıindisi salynýda. Halyq jaıaý tártippen jáne avtomobıldermen qulaqtandyrylýda. TJD kúshteri halyqty aldyn ala evakýasıalaýda. 148 adam, onyń ishinde 24 bala evakýasıalaý pýnktteri men týystarynyń úılerine evakýasıalandy, sondaı-aq 81 bas iri qara mal qaýipsiz jerge aıdaldy. Zardap shekken halyqty qabyldaý pýnktteri anyqtaldy, qabyldaýǵa daıyn, oqıǵa ornynda psıholog bar, – delingen habarlamada
Teplıchnoe aýylynyń turǵyndary aldyn ala evakýasıalandy. Ýaqytsha ornalastyrý úshin evakýasıalyq pýnktter aldyn ala daıyndaldy. 48 adam, onyń ishinde 15 bala evakýasıalandy.
Esil ózeninde sý deńgeıiniń kóterilýi saldarynan Zarechnoe aýylyndaǵy turǵyn úılerdi sý basý qaýpin boldyrmaý maqsatynda sý sorý jáne sý tasqyny jaǵdaıyna monıtorıńileý jumystary júrgizilip jatyr.
Shyǵys Qazaqstan oblysynda orta taýly aýmaqta qardyń erýi, taýlardyń ońtústik betkeılerinde qardyń erýi jáne jańbyr túrinde jaýǵan jaýyn-shashyn esebinen sý tasqynynyń ekinshi tolqyny ótýde. Búgingi tańda oblystyń 27% aýmaǵynda qar jatyr. Oblystyń jazyq aýmaǵynyń basym bóliginde qar ketkeni baıqaldy. Qar tek Marqakól aýdanynda ǵana bar. Oblystyń taýly aýmaǵynda qar qory normaǵa jaqyn. Gıdrologıalyq jaǵdaı turaqty. «Qazgıdrometpen» ózara is-qımylda qardyń jınalýyna, topyraqtyń qatý tereńdigine, sý aıdyndaryndaǵy muzdyń qalyńdyǵyna, sý deńgeıine, gıdrotehnıkalyq qurylystardyń tolymdylyǵyna monıtorıń júrgizilýde. 9 aerovızýaldy tekserý, ózenderde jarylys jumystary júrgizildi, 4940 sý ótkizý qurylysy, 551 shaqyrym aryqtar men kanaldar, 437 kópir tazartyldy.
