Saryaǵashtaǵy atyshýly medresede júrgizilgen tekseris qorytyndysy belgili boldy. Býllıng belgileri oqytýshylar tarapynan da anyqtalǵan, dep habarlaıdy bairaqmedia.kz total.kz-ke silteme jasap.
Balalar ombýdsmeni Dınara Zákıevanyń málimetinshe, qazir býllıngke ushyraǵan stýdentterge psıhologıalyq kómek kórsetilip jatyr.
Saryaǵashtaǵy medresede bolǵan jaǵdaıǵa qatysty joldaǵan hatyńyzǵa jaýap retinde habarlaımyn: Saryaǵash medrese-kolledjinde tekseris júrgizilip, qorytyndysyna sáıkes, stýdentter arasynda da, oqytýshylar tarapynan da býllıng belgileri anyqtaldy. Qazirgi ýaqytta barlyq mán-jaıdy jan-jaqty, tolyq ári obektıvti zertteýge baǵyttalǵan prosesýaldyq áreketter júrgizilýde. Sonyń nátıjesi boıynsha sheshim qabyldanatyn bolady. Býllıngke ushyraǵan stýdentterge psıhologıalyq kómek pen áleýmettik qoldaý kórsetilip jatyr, — delingen Dınara Zákıevanyń jaýabynda.
Eske salsaq, bul jaǵdaı Túrkistan oblysyndaǵy Satybaldy Ábishuly atyndaǵy meshitte bolǵan edi. Saryaǵash medrese-kolledjiniń quryltaıshysy Ábdijappar Smanov tań namazynda shákirtterge nasıhat aıtqan. Áleýmettik jelilerde taraǵan vıdeodan ýaǵyz aıtyp otyrǵan aqsaqaldyń aıaǵyn 3 balanyń ýqalap otyrǵanyn baıqaýǵa bolady. Buǵan kópshilik narazylyǵyn ashyq bildirgen bolatyn. Al, QMDB balalarǵa aıaǵyn ýqalatqan Ábdijappar ustazǵa eskertý jasaǵan-dy.
