Shymkent qalasynda kámeletke tolmaǵan qyzǵa qatysty qylmys jasaldy degen aqparat áleýmettik jelilerde keńinen tarap, jurtshylyqtyń qyzý talqysyna tústi, dep habarlaıdy bairaqmedia.kz.

Atalǵan derekke baılanysty Shymkent qalalyq polısıa departamenti resmı tergeý amaldary bastalǵanyn málimdedi.

Áleýmettik jelide jarıalanǵan vıdeoda jábirlenýshi ózine qatysty oqıǵanyń qalaı órbigenin baıandaıdy.

Onyń aıtýynsha, ózin kúshtep alyp qashyp, aldyn ala uıymdastyrylǵan túrde belgili bir úıge aparǵan. Sol jerde kúdiktiniń jaqyndary ony qalýǵa kóndirip, aqyr sońynda «eshqandaı shaǵymym joq» degen mazmunda hat jazýǵa májbúrlegen.

Boıjetken óz sózinde zorlyq-zombylyqqa ushyraǵanyn atap ótip, alaıda bul iske qatysy bar tulǵalardyń áli kúnge deıin zań aldynda tıisti jaýapkershilikke tartylmaǵanyn alǵa tartady.

Atalǵan jaǵdaıǵa qatysty polısıa departamenti resmı túsinikteme berdi.

Vedomstvo málimetinshe, qyzdyń aryzy negizinde qylmystyq is qozǵalǵan. İske qatysy bar barlyq tulǵa polısıa basqarmasyna jetkizilgen. Qazirgi ýaqytta istiń barlyq mán-jaıyn anyqtaý úshin qajetti tergeý sharalary keshendi túrde júrgizilip jatyr. Tergeý nátıjesine sáıkes prosesýaldyq sheshim qabyldanatyn bolady.