Sý jańa «Qaısar – Arena» stadıonynan keıin Qyzylordada aýqymdy joba – Eýropanyń úzdik fýtbol mektepteri úlgisimen salynatyn «Qaısar» fýtbol akademıasynyń qurylysy 2026 jyly bastalmaq. Akademıada jas sportshylarǵa arnalǵan jataqhana, mektep, asqana jáne jeti jattyǵý alańy qarastyrylady, dep habarlaıdy bairaqmedia.kz
Qyzylordada kásibı fýtboldy damytý baǵytynda jańa dáýir bastalǵaly tur. «Qaısar – Arena» stadıonynyń paıdalanýǵa berilýi óńir sportyndaǵy mańyzdy qadam bolsa, endi osy jetistikti tolyqtyratyn jańa joba – «Qaısar» fýtbol akademıasynyń qurylysy 2026 jyly qolǵa alynady.
“Jospar boıynsha munda 350 oryndyq jatyn ǵımarat, zamanaýı mektep, keń asqana, alty ashyq jáne bir jabyq jattyǵý alańy salynbaq. Bul ortalyqta qyzylordalyq jas fýtbolshylar horvatıalyq «Dınamo Zagreb» pen portýgalıalyq «Sportıng» akademıalarynyń eń ozyq ádistemesi boıynsha daıyndalady”, - delingen resmı habarlamada.
Klýb jekemenshikke ótkennen keıin jańa ınvestor ınfraqurylymdyq jańǵyrtýdy jyldam bastap, jergilikti fýtboldy júıeli túrde damytýǵa kúsh salýda. Al jańa akademıa bolashaqta Syr óńirinen jańa fýtbol juldyzdarynyń shyǵýyna múmkindik beredi.
Búginde Qyzylorda oblysynda sportpen turaqty shuǵyldanatyndar sany 343 myń adamnan asyp, 40,4 paıyzǵa jetken. Osy baǵyttaǵy jumystyń naqty nátıjesi – quny 26,5 mlrd teńgeni quraıtyn 11 myń oryndyq jańa stadıonnyń boı kóterýi. Qaladaǵy sol jaǵalaýda salynǵan alyp nysannyń jalpy aýdany 20 myń sharshy metrdi qamtıdy. Munda fýtbol alańymen birge zamanaýı talapqa saı boks, dzúdo, erkin jáne grek-rım kúresi, sporttyq gımnastıka, aýyr atletıka, taekvondo jáne fıtnes zaldary ornalastyrylǵan.
Barlyq sport alańdary halyqaralyq olımpıadalyq standarttarǵa sáıkes qural-jabdyqtarmen qamtylady. Ǵımarattyń birinshi qabatynda túrli sport túrlerine arnalǵan oqý-jattyǵý oryndary men fýtbolshylardyń arnaıy daıyndyq bólmesi bar. Ekinshi qabatta ákimshilik keńseler ornalassa, úshinshi qabatta úlken jıyndar ótkizýge arnalǵan májilis zaly qarastyrylǵan. Sonymen birge múmkindigi shekteýli sportshylardyń jattyǵýyna qolaıly jaǵdaı tolyq jasalǵan.
Stadıonnyń taǵy bir mańyzdy ereksheligi – onyń UEFA-nyń IV sanatyna sáıkestendirilgeni. Jasandy jabyndy sońǵy tehnologıalarmen tóselip, halyqaralyq talaptarǵa saı jaryqtandyrý júıesi ornatylǵan. Bul óz kezeginde Qyzylordada iri halyqaralyq sporttyq jarystar men mádenı sharalardy joǵary deńgeıde ótkizýge jol ashady.
Jýyrda Memleket basshysy Qasym-Jomart Toqaev jańa stadıonǵa arnaıy baryp, nysannyń múmkindikterimen tanysty. Prezıdent «Qaısar» fýtbol klýbynyń oıynshylarymen júzdesip, komandanyń bolashaǵyna senim bildirdi.
«Qaısar – elimizde jeke menshikke ótken alǵashqy klýbtardyń biri. Aldaǵy ýaqytta fýtbol akademıasy salynady. Klýbtyń keleshegi jarqyn bolady dep oılaımyn», – dedi Memleket basshysy.
Qyzylordada boı kóterip jatqan jańa sporttyq ınfraqurylym óńir sportynyń damýyna serpin berip, jas býynǵa kásibı deńgeıde bilim alyp, halyqaralyq standarttar negizinde jattyǵýǵa biregeı múmkindik ashady. Jańa stadıon men aldaǵy akademıa qurylysy Syr eliniń sporttyq áleýetin jańa beleske kóteretini sózsiz.
