Qyrǵyzstan taýynda qaıǵyly jaǵdaıda kóz jumǵan álpınısiń uly Mıhaıl Nagovısyn áleýmettik jeli arqyly Reseıdiń Bas prokýratýrasyna, Syrtqy ister mınıstrligine jáne Qyrǵyzstandaǵy Reseı elshiligine júginip, qutqarý operasıasyn uıymdastyrýǵa kómektesýdi surady, - dep habarlaıdy Azattyq Rýhy saıtyna silteme jasap.

Mıhaıldiń aıtýynsha, jekemenshik qutqarýshylar álpınıs áıeldiń naqty ornyn anyqtaý úshin dron qoldanyp, ıtalıalyq ushqyshty tartýdy josparlaǵan. Alaıda aýa raıy boljamynyń durys jasalmaýyna baılanysty operasıa iske aspaǵan. Budan bólek, aýa raıynyń qolaıly sátin kútip, ushýǵa daıyn turǵan top kenetten taratylyp jiberilgen.

«Komanda daıyn boldy, taýǵa kóterilip, dron arqyly barlaý ushyrmaq edi. Eger anamnyń tiri ekeni anyqtalsa, arnaıy tikushaqpen qutqarý operasıasy bastalatyn edi. Biraq belgisiz sebeppen 25-i kúni tańerteń komandany taratyp jiberdi. Boldy», – dedi Mıhaıl.

Onyń sózinshe, qajetti bıiktikke dron kóterýge daıyn erikti bar, biraq oǵan ushýǵa ruqsat berilmeı otyr. Qazir álpınısiń uly eki el bıliginen operasıaǵa ruqsat berip, anasynyń tiri ekeni rastalǵan jaǵdaıda birden qutqarý jumysyn bastaýdy surap otyr.

Aıta keteıik, reseılik álpınıs Natalá Nagovısyna shyńǵa órmeleý kezinde aıaǵynan jaraqat alyp, eki aptadaı ýaqyt Qyrǵyzstandaǵy Jeńis shyńynda jalǵyz qaldy. Buǵan deıin ony evakýasıalaý áreketterine aýa raıy kedergi bolǵan. Solardyń birinde Qyrǵyzstan Qorǵanys mınıstrliginiń tikushaǵy qatty qonýǵa májbúr bolyp, al basqa bir álpınısik topta ıtalıalyq sportshy Lýka Sınıgalá qaza tapqan edi.