Qyrǵyzstan prezıdenti Sadyr Japarov balalardy zorlaý, áıelderdi zorlaý jáne óltirý sıaqty asa aýyr qylmystar úshin ólim jazasyn engizýge shaqyrdy, dep habarlaıdy bairaqmedia.kz.
30 qyrkúıekte Qyrǵyzstannyń Ystyqkól oblysynda 17 jastaǵy qyzdyń urlanǵany, zorlanǵany jáne óltirilgeni týraly aqparat tarady.
Qyrǵyzstan prezıdentiniń baspasóz hatshysy Asqat Alagózov kámeletke tolmaǵan Aısulýdyń erekshe aıýandyqpen óltirilýine qatysty is prezıdent Sadyr Japarovtyń jeke baqylaýynda ekenin habarlady.
— Memleket basshysy qoǵamdy dúr silkindirgen bul qylmys týraly habardy qatty ókinishpen qabyldady. Sonymen birge ol Prezıdent ákimshiliginiń quqyqtyq qamtamasyz etý basqarmasynyń basshysy Murat Ýqyshevqa balalarǵa, qyzdarǵa jáne áıelderge qarsy qylmystar úshin barynsha qatań jazany qarastyratyn zańnamalyq túzetýler ázirleýdi tapsyrdy. Atap aıtqanda, másele balalardy zorlaý, sondaı-aq áıelderdi zorlap óltirý úshin ólim jazasy týraly normany engizý týraly bolyp otyr, — dep túsindirdi ol.
Qyrǵyzstan Respýblıkasynyń normatıvtik-quqyqtyq aktiler jobalaryn qoǵamdyq talqylaý portalynda da azamattardyń Qylmystyq kodekske ózgerister engizý týraly usynysy jarıalandy.
Bastamashylar erekshe qatygezdikpen jasalǵan kisi óltirý, kámelettik jasqa tolmaǵan balany óltirý jáne zorlaý nemese basqa da zorlyq-zombylyq sıpattaǵy seksýaldyq árekettermen baılanysty kisi óltirý úshin ólim jazasyn belgileýdi usynyp otyr.
Ólim jazasy úkim zańdy kúshine engennen keıin jáne barlyq sot ınstansıalarynda qaralǵannan keıin ǵana qoldanylýy múmkin ekeni atap ótilgen. Ólim jazasy áıelderge nemese kámeletke tolmaǵandarǵa qoldanylmaýy tıis.
Elde kámeletke tolmaǵandardy óltirý jáne zorlyq-zombylyq kórsetý faktileriniń kóbeıýi qoldanystaǵy jazalardyń jetkiliksiz ekenin kórsetip otyr.
Bastamashylardyń pikirinshe, erekshe jaǵdaılarda ólim jazasyn engizý qoǵamdy qorǵaýǵa, mundaı qylmystardyń aldyn alýdy kúsheıtýge, jazanyń bultartpastyǵy qaǵıdatyn nyǵaıtýǵa septigin tıgizedi.
Buǵan deıin Tramp Vashıngtonda ólim jazasyna kesýge ruqsat bergenin jazǵan bolatynbyz.
