Almaty oblysynyń Qarasaı aýdanyna qarasty Jalpaqsaı aýylynda aýyr jaǵdaı boldy. 10 jasar balany úsh ıt talap, bala aýyr halde Qaskeleń qalasyndaǵy aýrýhananyń jansaqtaý bólimine tústi, dep habarlaıdy Azattyq Rýhy.

Oqıǵa 16:30 shamasynda aýyldaǵy fýtbol alańynda bolǵan. Kýágerlerdiń aıtýynsha, alańda balalar fýtbol oınap júrgende birneshe ıt ishke kirip ketken. Balalardyń kópshiligi qashyp úlgergenimen, Maksım esimdi balaǵa úsh ıt - eki ovcharka men bir pıtbýl shabýyl jasaǵan.

Itterdi ajyratý uzaq ýaqytty alǵan. Saldarynan balanyń qulaǵy julynyp, jambas tusy jyrtylyp, basynan da aýyr jaraqat alǵan. Qazir dárigerler balanyń ómirin saqtaý úshin kúresip jatyr.

Almaty oblysynyń polısıa departamenti atalǵan fakti boıynsha Qylmystyq kodekstiń 104-baby («Abaısyzda aýyr zıan keltirý») boıynsha is qozǵap, sotqa deıingi tergeýdi bastap ketti.

«Qazirgi tańda oqıǵanyń kýágerlerinen jaýap alynyp, barlyq mán-jaı jan-jaqty, tolyq jáne obektıvti túrde anyqtalýda. Tıisti saraptamalar taǵaıyndaldy. Onyń nátıjesine baılanysty prosesýaldyq sheshim qabyldanady», – delingen polısıa taratqan habarlamada.

Sonymen qatar, ıtterdiń ıeleri men jaýapty tulǵalardyń áreketine quqyqtyq baǵa beriletini habarlandy. Barlyq kináli azamat qoldanystaǵy zańnamaǵa sáıkes jaýapkershilikke tartylady.