46 jastaǵy Rýslan Ýmaev burynǵy kelinin uıyqtap jatqanda býyndyryp óltirip, denesin kólik dońǵalaqtarymen birge órtep, qaldyqtaryn ózenge tastaǵan. Bul týraly qaýipsizdik organdaryna Baza Telegram-arnasy málimdedi.
Marqum Krıstına – Máskeý mańyndaǵy Lobná qalasynyń týmasy. Ol 2019 jyly Ahmed esimdi jigitpen tanysyp, bir jyldan keıin oǵan turmysqa shyǵyp, kúıeýiniń týǵan jeri – Sheshenstanǵa qonys aýdarǵan. Alaıda qyzdyń týystary men qurbylary Ahmed úılengisi kelmegenin, biraq ákesi – Rýslan Ýmaevtyń qysymymen ǵana úılengenin aıtqan.
Krıstına turmysta qıyn ómir súrgen: kúıeýi uryp-soǵyp, enesi tıisip, qyzy ekeýine keıde tamaq tabylmaı qalatyn. Biraq qaıyn atasy jaıly ol eshqashan jaman sóz aıtpaǵan.
2022 jyly Krıstına ajyrasýǵa sheshim qabyldap, Máskeý mańyna qaıta oralǵan. Alaıda sheshen týystary qyzymen birge qamqorlyqqa ortaq quqyǵyn alyp, ol qyzy úshin jıi Sheshenstanǵa baryp júrgen. Bul ýaqytta kúıeýi múlde qatyspasa da, burynǵy qaıyn atasy Krıstınanyń janynan tabylyp júrgen.
Marqumnyń anasy men qurbysy Rýslan Ýmaevtyń sońǵy kezderi Krıstınaǵa oǵash, shamadan tys kóńil bólgenin, tipti oǵan sezimin bildirip, májbúrleýge tyrysqan bolýy múmkin ekenin aıtqan.
2024 jyldyń qyrkúıeginde Krıstına Sheshenstanda júrgen kezde baılanysqa shyqpaı qalady. Birneshe kúnnen soń anasy onyń qaıtys bolǵanyn buqaralyq aqparat quraldarynan bilgen. Rýslan Ýmaev qylmysyn moıyndap, uıyqtap jatqanda kelinin býyndyryp óltirip, denesin úıiniń aýlasynda dońǵalaqtarmen birge órtep, qaldyqtaryn ózenge tastaǵanyn aıtqan. Tergeý barysynda onyń úıinen qan izderi bar tunshyqtyrǵysh jip pen qyz jatqan dıvannan sháýettiń izi tabylǵan.
Ýmaev Krıstınany «amoraldy áreketi úshin» óltirgenin aıtqan. Qylmystyq is qozǵalǵanymen, sot úkimi shyqqan joq. Óıtkeni ol Reseı Qorǵanys mınıstrligimen kelisimshartqa otyryp, Ýkraınadaǵy soǵysqa attanyp ketken. Marqumnyń anasy Anastasıanyń aıtýynsha, advokat sotqa isti toqtatý týraly ótinish joldap, sot kelisimsharttyń kúshine baılanysty tergeýdi ýaqytsha toqtatqan.
