Prezıdent Qasym-Jomart Toqaev "Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly" jarlyqqa qol qoıdy, dep habarlaıdy bairaqmedia.kz.

Memleket basshysynyń baspasóz qyzmetiniń málimetinshe, Ulttyq quryltaıdyń IV otyrysynda sarapshylar men qoǵam qaıratkerleri ishki saıasat salasynda júrgizilip jatqan barlyq jumysty retteıtin biryńǵaı tujyrymdamalyq qujat ázirleýdi usynǵan edi.

Prezıdent bul ıdeıany qoldap, onyń memlekettik qurylymdar jumysyn júıelendirýge baǵyttalýy kerek ekenin atap ótken bolatyn.

Prezıdent Ákimshiligi men múddeli memlekettik organdar memleket basshysynyń jyl saıynǵy joldaýlaryn, sóılegen sózderin, Qazaqstan Respýblıkasynyń 2029 jylǵa deıingi ulttyq damý josparyn negizge ala otyryp, "İshki saıasattyń negizgi qaǵıdattary, qundylyqtary men baǵyttary" qujatyn daıyndaǵan.

Tujyrymdamalyq qujatty ázirleýge Ulttyq quryltaıdyń músheleri, sarapshylar, ǵylymı jáne qoǵamdyq uıymdardyń ókilderi belsene atsalysqan.

Atalǵan qujat birinshi kezekte memlekettik organdarǵa arnalǵan. Onyń basty maqsaty – ishki saıasat salasyndaǵy jumysty júıeleý ári úılestirý.

Onda "Zań jáne tártip", "Halyq únine qulaq asatyn memleket", "Túrli kózqaras – birtutas ult", "Kúshti prezıdent – yqpaldy parlament – esep beretin úkimet", "Adal azamat", "Taza Qazaqstan" sekildi ishki saıasat qaǵıdattary qamtylǵan.

Sondaı-aq Ulttyq quryltaı otyrystarynda kóterilgen jalpyulttyq qundylyqtardyń tizbesi engizilgen. Jalpyulttyq biregeılikti tanytatyn ulttyq nyshandar júıesi jasalǵan.

Qujatta qoǵamdyq dıalog, etnosaralyq qatynas, din, mádenı-gýmanıtarlyq, otbasy, jastar, aqparat sekildi ishki saıasattyń basym baǵyttary aıqyndalǵan. Qabyldanǵan tujyrymdamalyq qujat memlekettik organdardyń ishki saıasat salasyndaǵy jumysyn uıymdastyrýǵa negiz bolady.