Tanymal ánshi Qaraqat Ábildına óziniń instagram-daǵy paraqshasynda ajyrasqan ónerli jup Tursynbek Qabatov pen Móldir Muqanova týraly jazdy. Sondaı-aq ol baqytty otbasyny buzatyn áıelder týraly da aıtty, dep habarlaıdy bairaqmedia.kz.

"Neshe kún boıy jurttyń bári jarysa jazyp jatqan podkastty men de alǵashqylardyń biri bolyp kórdim. Móldirdiń jan syryn tyńdap, jylap ta aldym. Jaqsy tanıtyn, tórinde otyryp, qurmetin kórgen, baqytty sátteriniń kýási bolǵan otbasynyń shańyraǵy shaıqalǵany ońaı tımeı tur.
⠀
Birinshi kúni emosıaǵa berilip post jazbaǵanym da sodan. Birin dattap, birin aqtaý emes meniń maqsatym. Ekeýin de jaqsy kóretin jandar retinde, máseleniń basy shyǵyp, el dúrlige bastaǵanda bir kóılek erte tozdyrǵan apaıy ári janashyry retinde “aqylǵa kelińder” dep toqtaý aıtqanym bar. Tanymal adamdar bolǵan soń, halyqtyń qyraǵy kózi bárin baıqaıdy. Biraq osynshalyqty ýshyǵyp ketedi dep oılamaǵan edik.
⠀
Bundaı jaǵdaı qoǵamda jıi kezdesedi. Sonda deımin, bireýdiń aırandaı uıyp otyrǵan otbasyn oıran etetin qatyndar ne oılaıdy eken?! Basqanyń baqytyn urlap, ózi baqytty bolam deý naǵyz adasqandyq!
Tana kózin súzbese, buqa jibin úzbeıdi. Sen kezdesip júrgen, «súıem», «saǵyndym» deıtin erkek bireýdiń ómirlik jary,
bir úıdiń tiregi, bir balanyń asqar taý ákesi.
⠀
Sol baqytty tartyp alyp, ne kútesiń? Baqyt pa? Joq! Baqyt eshqashan bireýdiń kóz jasynan, qarǵysynan, obalynan quralmaıdy! Naǵyz baqyt adal jolmen, armen, uıatpen, saýappen keledi! Esińdi jı! Kóz jasy jibermeıdi, Allanyń qaharyna ushyrap qalma, bireýdiń otyn óshirem dep, ózińniń de shyraǵyńdy sóndirip alma!
⠀
Kópke topyraq shashýdan aýlaqpyn, degenmen áıeliniń qadirine jete almaı júrgen er adamdarǵa da aıtatyn sóz bar: Sizdiń abyroıyńyz úshin jastyq shaǵyn, búkil ómirin sarp etken, ystyǵyna da, sýyǵyna da kóngen, uıasyn qyzǵyshtaı qorǵap, otbasyn saqtap qalý úshin sońyna deıin baratyn áıelderińizdi qurmettep, baǵalańyzdar!
⠀
Ómirde túrli jaǵdaı bolady. Kim qatelespeıdi, jańylmaıtyn jaq, súrinbeıtin tuıaq joq deıdi. Oılanýǵa ýaqyt kerek shyǵar. Qudaı qalasa osy aýyr synaqtan da aman-esen shyǵyp, otbasynyń sol baıyrǵy ádemi kúıge keletininen úmit úzbeıik. Tilektespiz.

Kópke úlgi otbasynyń biri edi, bálkim, til-kóz tıgen shyǵar. Sondyqtan da ýshyqtyrýdyń, ony odan saıyn údetip qaıta-qaıta jazýdyń esh qajeti joq.
⠀
Biz - tekti eldiń urpaǵymyz. Otbasy biz úshin kıeli uǵym. Allanyń atymen qurylǵan aq nekeni buzýǵa eshkimniń haqysy joq. Eshkimdi túzý joldan adastyrmasyn", - dep jazdy ol.