Qazaqstan Respýblıkasynyń Atomdyq energıa jónindegi agenttiginiń tóraǵasy Almasadam Sátqalıevtiń aıtýynsha, Qazaqstanda atom elektr stansıasyn salý keminde 14 mlrd dollarǵa túsedi, dep habarlaıdy bairaqmedia.kz.
Parlament kýlýarynda jýrnalıserdiń suraqtaryna jaýap bergen Sátqalıev AES qurylysynyń naqty quny ázirge belgilenbegenin atap ótti. Onyń aıtýynsha, álemdik tájirıbede osyndaı deńgeıdegi AES-ter dál osyndaı somaǵa baǵalanady. Qazir jobaǵa qatysty tehnıkalyq-ekonomıkalyq negizdeme ázirlenip jatyr. Qurylys quny tehnıkalyq-ekonomıkalyq negizdeme aıaqtalǵan soń naqty belgili bolady.
«Quny tehnıkalyq-ekonomıkalyq negizdemege súıenip anyqtalady. Degenmen, jahandyq tájirıbege súıensek, mundaı deńgeıdegi stansıalardyń quny shamamen 14 mıllıard dollardan bastalady», - dedi ol.
Esterińizge sala keteıik, 2024 jyly AES salý boıynsha referendým ótti. Referendýmda 7 820 204 adam daýys berip, 5 561 937 adam AES qurylysyn qoldaǵan. Al 2025 jylǵy 14 maýsymda belgili bolǵandaı, birinshi stansıany reseılik «Rosatom», al ekinshi AES-ti Qytaıdyń CNNC kompanıasy salýy múmkin.
«Rosatom» men Qazaqstan eki VVER-1200 reaktoryn salýǵa arnalǵan jol kartasyn da bekitti. Qurylys shamamen 11 jylǵa sozylyp, 2035–2036 jyldary aıaqtalýy múmkin.
