Memleket basshysy aqyn, Qazaqstannyń Halyq jazýshysy Temirhan Medetbektiń otbasy men jaqyn týystaryna kóńil aıtý jedelhatyn joldady, dep habarlaıdy Bairaqmedia.kz.
Prezıdent Qasym-Jomart Toqaev aqyn, Qazaqstannyń Halyq jazýshysy, Memlekettik syılyqtyń laýreaty, «Qurmet» jáne «Parasat» ordenderiniń ıegeri, qoǵam qaıratkeri Temirhan Medetbektiń dúnıeden ótýine baılanysty onyń otbasy men jaqyn-jýyqtaryna kóńil aıtty.
Temirhan Medetbek ǵıbratty ǵumyryn ult rýhanıatyna arnaǵan, tól ádebıetimiz ben ónerimizdiń janashyry bolǵan tegeýrindi aqyn edi. Kóne túrki sarynyn jańǵyrtqan rýhty shyǵarmalary oqyrman tarapynan joǵary baǵalandy. Qazaq baspasóziniń órkendeýine eleýli eńbek sińirip, naǵyz shyǵarmashyl tulǵa retinde ónegeli ómir súrdi. Sońyna ádebı baı mura qaldyrǵan Temirhan Medetbektiń jarqyn beınesi men esimi umytylmaıdy, – delingen jedelhatta.
Temirhan Medetbek 1945 jyly 6 naýryzda Ońtústik Qazaqstan oblysy Túrkistan aýdanyna qarasty Amangeldi atyndaǵy kolhozda (qazirgi Nurtas aýyly) dúnıege kelgen.
Ol – «Sapar aldynda» (1973), «Alys shaqyrymdar» (1975), «Kógershin qaýyrsyndary» (1982), «Daýys» (1984), «Qalalyq eskızder» (1985), «Taǵdyrly jyldar jyrlary» (2000), «Kók túrikter saryny» (2001) atty jyr jınaqtarynyń avtory.
Ádebıet týraly tolǵamdary: «Abaı álemi» (1995), «Baba dástúrdiń murageri kim: týǵan ádebıet týraly oılar» (2006), «Segiz qyrly, seksen syrly álem bul» (týǵan ádebıet týraly oılar), «Kúretamyr» (2012).
Avtorlyq poemalary: «Mahambet rýhynyń monology», «Kúltegin», «Tonykók».
Qazaq aqynynyń óleńderi qyrǵyz, ózbek, ýkraın, orys, qytaı jáne tatar tilderine aýdarylǵan.
