Bul oqıǵa 10 mamyr kúni Jetisý oblysynyń Kerbulaq aýdanynda bolǵan. Kóksý ózeninen arqan arqyly ótpek bolǵan er adam ózenniń ortasyna kelgende sýǵa aǵyp ketken dep habarlaıdy bairaqmedia.kz

Er adam qyzyq qýyp, aǵyndy Kóksý ózeniniń bir jaǵynan ekinshi betine arqan arqyly ótpek bolǵan. Bolǵan jaǵdaıdy onyń dosy vıdeoǵa túsirip turǵan. Alaıda, ózenniń orta tusyna kelgende kúshi sarqylǵan ol aıaǵyn arqannan túsirip, ilinip turǵanda ony aǵys alyp ketken. Er adamnyń denesi áli kúnge deıin tabylar emes.

Aldyn ala málimet boıynsha, Otarda áskerı qyzmette bolǵan er adam ózenge aǵyp ketti. Alaıda bul aqparat áli rastalǵan joq. Ázirge resmı túsinikteme de berilgen joq. Aqparatty rastaıtyn nemese teriske shyǵaratyn jandar bolsa, habar berýińizdi suraımyz, - delingen áleýmettik jelide taraǵan vıdeonyń jazbasynda.

Bul jaǵdaıǵa qatysty polısıa qylmystyq is qozǵaǵan.

İzdestirý jumystaryna polısıa qyzmetkerleri, áskerı qyzmetkerler, qutqarýshylar, basqa da vedomstvolardyń ókilderi men qarapaıym azamattar jumyldyryldy. İzdeý jumystary jalǵasyp jatyr, – dedi Jetisý oblystyq polısıa departamenti. 

Jetisý oblysynyń TJD málimetinshe, joǵalǵan azamat 1989 jyly týǵan. 11 mamyr kúni tańǵy 06:30-dan bastap TJD, orman sharýashylyǵy, jergilikti atqarýshy organdar, polısıa, áskerı polısıa jáne Qorǵanys mınıstrliginiń bólimsheleri qatysqan aýqymdy izdeý jumystary uıymdastyryldy. Barlyǵy 98 adam men 22 tehnıka birligi, sonyń ishinde júzý quraldary, drondar jáne spýtnıktik baılanys quraldary jumyldyryldy.

İzdeý jumystary Kóksý ózeniniń boıymen uzyndyǵy 35 shaqyrymǵa deıingi aýmaqta 8 toppen júrgizildi (oń jaǵalaý boıymen 4 top, sol jaǵalaý boıymen 4 top), – delingen TJD habarlamasynda.