Soltústik Qazaqstan oblysynda polısıa joǵalyp ketken egde jastaǵy áıeldiń ólimine qatysty tergeý júrgizýde. Zeınetker aıazda úsip, kóz jumǵan, dep habarlaıdy bairaqmedia.kz Soltústik Qazaqstan oblysynyń polısıa departamentine silteme jasap.

Vedomstvonyń málimetinshe, 14 qańtar keshke polısıaǵa Petropavl qalasyndaǵy 314-shi atqyshtar dıvızıasy kóshesindegi úılerdiń birinde turatyn 75 jastaǵy turǵyn joǵalyp ketkeni týraly habarlama kelip túsken.

Zeınetker áıel saǵat 13:00 shamasynda úıinen jalǵyz ózi aýrýhanaǵa shyǵyp, qaıta oralmaǵany anyqtaldy. Al uıaly telefony óshirýli bolǵan.

Departament ókilderiniń aıtýynsha, densaýlyq jaǵdaıyn eskerse, áıeldiń adasyp qalǵan bolýy múmkin.

"İzdeýge qala ákimdigi men qalalyq polısıa basqarmasy qyzmetkerleri, arnaıy jyldam qımyldaıtyn arnaıy jasaq bólimsheleri, Ulttyq gvardıa áskeri jáne eriktiler jumyldyryldy. İzdeý jumystaryna 60-tan astam adam qatysty. Jumysty aýa temperatýrasynyń tómen bolýy aıtarlyqtaı qıyndatty. Onyń joǵalyp ketýiniń yqtımal sebepteri zertteldi, júrýi múmkin jerler tekserildi jáne beınebaqylaý jazbalary qaraldy. Alaıda qarańǵy bolǵandyqtan joǵalǵan áıeldi tabý múmkin bolmady", - deıdi oblystyq polısıa departamenti ókilderi.

15 qańtar tańerteń ýchaskelik polısıa qyzmetkeri aýrýhanaǵa jaqyn komýnaldyq ǵımarattyń janyndaǵy adam az júretin jerden, qorshaýdyń janynan egde jastaǵy áıeldi tapty.

Áıeldiń jaǵdaıy aýyr boldy jáne qatty tońǵanyna baılanysty sóıleýge shamasy kelmedi. Ol dereý jedel járdem brıgadasyna tapsyryldy, biraq ókinishke qaraı, ony aman alyp qalý múmkin bolmady.

Polısıa 14 qańtardyń keshinen 15 qańtardyń tańyna deıin iz-tússiz joǵaldy delingen egde jastaǵy áıeldiń ólimine qatysty qylmystyq is qozǵady